Nga 30 ditë paraburgim Gëzim Vitisë dhe Erkan Mustafës

Gjilan – Gëzim Vitia dhe Erkan Mustafa dyshohen se më 11 nëntor pas përfundimit të ndeshjes Drita –Llamkos kanë shkaktuar dëm thelbësor material , duke e goditur me mjete të forta autobusin e Prishtinës, dhe duke e goditur me mjete të forta shoferin e autobusit. Gjykatësi i procedurës paraprake Abdullah Ahmeti u ka caktuar masën e paraburgimit prej 30 ditësh Vitisë dhe Mustafës.

Policia e Gjilanit dhe Prokuroria e Qarkut nuk kanë qëndruar duarkryq pas takimit të ndeshjes futbollistike mes Dritës dhe Llamkosit të Vushtrrisë. Policia ka arritur të prangos dy të dyshuarit e parë që kanë shkaktuar dhunë më 11 nëntor.

Të mërkurën gjykatësi i procedurës paraprake Abdullah Ahmeti u ka caktuar masën e paraburgimit prej 30 ditësh dy të dyshuarve të parë Gëzim Vitia dhe Erkan Mustafa. Edhe njëri edhe tjetri janë emra të njohur për policin dhe gjykatën e Gjilanit , meqë janë dënuar edhe më parë për vepra tjera penale.

Gjykatësi Abdullah Ahmeti tha për rajonipress se Gëzim Vitia dhe Erkan Mustafa dyshohen për veprën penale “shkaktimi i rrezikut të përgjithshëm”.

Sipas aktvendimit për zhvillimin e hetimeve Gëzim Vitia dhe Erkan Mustafa dyshohen se më 11 nëntor rreth orës 15. e 55 minuta në bashkëveprim edhe me disa persona të tjerë, pas përfundimit të ndeshjes futbollistike në mes të Dritës dhe Llamkosit të Vushtrrisë, kanë shkaktuar dëm thelbësor material, ashtu që i godasin me mjete të forta dy autobusët me tabela të Prishtinës, duke ua shpërthyer gomat dhe duke ia thyer dëmtuar xhamat dhe karrocerinë, ku më pas i godasin me mjete të forta dhe i shkaktojnë lëndime të rënda trupore shoferëve të autobusëve të dëmtuarve Fadil Azemi dhe Mahmut Maliqi, që të dy nga Vushtrria, ku si pasojë e lëndimeve të marra të njëjtit janë duke u kuruar në QKUK thuhet në aktvendimin e prokurorit Arben Kadriu.

Në bazë të kallëzimit penal që ka përgatitur policia dhe vendimit për zhvillim të hetimeve nga ana e Prokurorisë së Qarkut , gjykatësi Abdullah Ahmeti edhe ka vendosur për masën e paraburgimit prej 30 ditësh.

Ndryshe Gëzim Vitia është liruar më herët nga burgu me vendim të Gjykatës së Qarkut në Gjilan edhe pse ishte i dënuar me pesë vite burgim i dyshuar për vrasjen e të riut 16 vjeçar Egzon Kqiku. /rajonipress/