Nexhmie Kallaba i bashkohet AKR-së

Kamenicë – Degës së AKR-së në Kamenicë sot i është bashkuar ish nënkryetarja e Komunës së Kamenicës, anëtarja e kryesisë së LDK-së, Nexhmie Kallaba.

Kallaba ka një eksperiencë të madhe në angazhimin e saj politik, pesë vite ka qenë nënkryetare e Komunës së Kamenicës dhe kontribuuese e madhe në gjithë zhvillimin e Komunës së Kamenicës. Ajo është një ndër zërat më të fuqishëm të angazhimeve për barazinë gjinore në Kosovë, raporton rajonipress.

“Jam e përkushtuar të vazhdojë të jap kontributin tim për komunën time, dhe këtë tanimë më së miri mund ta bëj përmes AKR-së. Zhvillimi ekonomik i Kosovës duhet të jetë në top agjendën e qeverisë së ardhshme dhe nuk ka dyshime se AKR përfaqëson alternativën më të mirë për këtë çështje. Jam mbështetëse e fuqishme e idesë së Presidentit Pacolli që autostrada të vijë te “Dheu i Bardhë” për t`i dhënë rastin e zhvillimit edhe kësaj pjese të Kosovës” tha Nexhmie Kallaba me rastin e aderimit.

Kurse Fatmir Matoshi kryetar i degës së AKR-së në Kamenicë tha se AKR është mjaft e nderuar që sot i është bashkuar zonja Kallaba, “AKR do të jetë shtëpia e saj, dhe ardhjet e këtilla na bëjnë të besojmë se jemi në rrugë të drejtë dhe po përfaqësojmë interesin e qytetarëve në mënyrë dinjitoze. Do të punojmë së bashku me zonjën Kallaba që Kamenica të jetë më e zhvilluar në të gjitha aspektet” tha Matoshi./rajonipress/