Nevzati: Qyteti ynë nuk ka nevojë për mashtrime e projekte propagandistike, por për zgjidhje konkrete e serioze

Gjilan – Përulja para kamerave nuk mund ta mbulojë dështimin e tyre për të garantuar shëndetin publik, sigurinë e qytetarëve dhe një mjedis urban të denjë për të jetuar. Qeverisja komunale në Gjilan po vazhdon ta mashtrojë opinionin me projekte të zbukuruara vetëm për fotografi e marketing politik ka shkruar Bujar Nevzati.

Reagimi i plotë:

Qeverisja komunale në Gjilan po vazhdon ta mashtrojë opinionin me projekte të zbukuruara vetëm për fotografi e marketing politik.

Dje u përurua i ashtuquajturi “bulevard i qytetit”, ndërkohë që vetëm dhjetë metra larg zyrës së Kryetarit, në rrethrrotullimin e qendrës, qytetarët ballafaqohen çdo ditë me qentë endacakë – rrezik i drejtpërdrejtë për fëmijët, gratë, të moshuarit dhe të gjitha shtresat e shoqërisë.

Shikoni në çfarë gjendje është ky rrethrrotullim në qendër të qytetit!
Kjo pamje nuk i përngjan një qyteti normal, e lëre më qytetit të Gjilanit.

Ky ndryshim i hidhur e dëshmon qartë se prioritetet e kësaj qeverisjeje nuk janë siguria dhe mirëqenia e qytetarëve, por fasadat e përkohshme që nuk i japin asnjë zgjidhje problemeve reale të përditshme.

Përulja para kamerave nuk mund ta mbulojë dështimin e tyre për të garantuar shëndetin publik, sigurinë e qytetarëve dhe një mjedis urban të denjë për të jetuar.

Qyteti ynë nuk ka nevojë për mashtrime e projekte propagandistike, por për zgjidhje konkrete e serioze për problemet elementare që prekin çdo familje në Gjilan!