Nevzati: Gjilani e ka një kryetar të papërgjegjshëm

Gjilan – Bujar Nevzati këshilltar komunal nga radhët e PDK-së duke mos u pajtuar me raportin e Lutfi Haziri për punën gjashtë mujore ka dhënë shumë akuza e kritika në adresë të tij dhe qeverisjes aktuale. Nevzati ka thënë se Lutfi Haziri është kryetar vetëm i llafeve dhe punëve të kota sepse nga ardhja e tij në qeverisje, Gjilani është degraduar në të gjitha fushat.

Bujar Nevzati këshilltar nga radhët e PDK-së ka dhënë një mal kritikash në seancën e fundit ku Lutfi Haziri foli në superlativ për punën e tij gjashtë mujore.

Nevzati tha se meqë zyra për informim është shndërruar në zyre të propagandës dhe dezinformimit të kryetarit Haziri, atëherë ai është i detyruar që diskutimin e tij ta bëjë publik.

Nevzati tha se raporti i punës gjashtë mujore të Kuvendit Komunal e mbajtur në seancën e djeshme është raporti i mangët, i padërguar nëpër komitete përkatëse dhe i pa miratuar nga ana e tyre, ashtu siç thotë ligji për qeverisjen komunale, i papërpunuar nga ana e kryetarit Haziri, të cilin raport duhet ta shkruante ai e jo ashtu siç e ka sjellur nga drejtorët e drejtorive përkatëse. “Raport lavdërues, pa asnjë vërejtje apo pengesë që e kanë hasur në punë. Raport sikur ta kishin bërë ndonjë bashkësi lokale e largët e jo një komunë e madhe siç është komuna e jonë. Po ashtu zoti Haziri në fjalën e tij as që zuri në gojë drejtorinë e urbanizmit, inspeksionit, zhvillimit ekonomik, kulturën, rininë e sportin, prokurimin” ka thënë Nevzati etj.

Nevzati tha se ka kërkuar nga Haziri t`i ndal fjalët e të fillon punën konkrete për të cilat është zgjedhur, sepse në publik po deklarohet, pastaj kur po i themi ato që duhet për t`i thënë po i dhemb. “Kah të shkon deklaron se po e ruajmë kuletën e popullit, dhe kemi aplikuar dietën buxhetore. A në anën tjetër përmes deklarimit të pasurisë jeni dalur si kryetari më i pasur. Si ka mundësi, që ju 15 vite keni marrë pagë mesatarisht nga 1000 euro deri në 1500 euro, derisa ju ndonjë biznes privat nuk keni. Prej kah e gjithë kjo pasuri. Keni ndarë për festën e Bajramit 1000 euro për ndihma, kurse keni thënë nga kursimet. Si i kursyet ju këto para, kur dihet sa shpenzoni për një ditë e mos të flasim për një muaj një familje” ka shtruar dilemat Nevzati.

Nevzati ka pasur një kërkesë për Hazirin. “Prandaj po të lusim, kujdes nga fjalët e mëdha, se qytetarët nuk po han kashtë. Po ashtu e keni shuar drejtorin e inspeksionit, vetëm e vetëm për tu pasuruar individët e jo për ta rregulluar qytetin. Ju edhe në qeverisjen e mëhershme keni bërë këtë, vetëm t`i fshehur dallaveret e krimit. Dilni e shikojeni qytetin si e keni shëmtuar. Shikojeni ndërtesën e Berjanëve te spitali, ndërtesën në Dardani, ndërtesat në Dheu i Bardhë, të gjitha në ish qeverisjen tuaj, në vitet 2000 – 2007. Njëjtë e keni filluar qeverisjen edhe tash, e keni pasur të gatshëm projektin e shkollave të mesme dhe e keni shkatërruar atë me lejimin e asaj ndërtese pa asnjë plan. Ai person pesë vite në qeverisjen tonë ka kërkuar leje, por nuk ka mundur të merr sepse ne nuk kemi lejuar ta shkatërrojmë kompleksin e shkollave. Ju posa keni ardhur në pushtet, ai person ju ka blerë dhe menjëherë ka marrë leje. Kështu po ndodhë përditë para syve tuaj shkatërrimi i qytetit e ju s`keni guxim ta merrni asnjë hap në parandalimin e kësaj dukurie, sepse jeni i përzier edhe ju aty, ndryshe si mund të ndodhë kjo edhe 16 vite pas luftës” ka shtuar Nevzati.

Nevzati e kë përkujtuar Hazirin se e ka degraduar sheshin Xhavit Ahmeti me një kafiteri pranë tij. “Poashtu nuk mundeni me rregullue sepse keni nënshkruar kontrata për lejimin e tyre gjatë fushatës. Edhe Lumi “Mirusha” as edhe një metër s`keni mundur ta lëvizni. Ju kujtohen deklaratat pas marrjes së pushtetit se në qershor do ta përfundojmë gropën e Hajdin Sejdisë. Parkingu në qendër të qytetit i vetmi që ka mundur me i shërbye mërgimtarëve të cilët kanë ardhur në këto ditë pushimi dhe ju e keni marrë dhe në këtë kohë e keni dhënë për një vlerë simbolike për biznes një personi privat për lojërat e cirkut. Pastaj punëtorët e pranuar pa konkurs, mos disiplina në punë, mos guximi dhe mos aftësia për ta kompletuar qeverisjen komunale”.

Nevzati ka thënë para kuvendarëve se mos qëndrimi i Lutfi Hazirit në vendin e punës e bëjnë atë një kryetar të papërgjegjshëm, që qytetarët të mos presin asgjë nga ai. “Unë gjithashtu ngrita çështjen e tenderimit të projekteve që po vonohen me muaj të tërë derisa po goditen me punëkryesit. Çështjen e transferimit të punëtorëve të arsimit, pa asnjë kriter, ku kriter i vetëm është sa më i pasur që është punëtori aq më lehtë e më shpejt i kryhet puna. Çështjen e dëmtimit të pendës në Përlepnicë ndërprerja e punimeve në shtëpinë e kulturës, e shumë kërkesa e vërejtje të tjera. Dhe për ironi, a e dini si na është përgjigjur zoti kryetar. “Se arat Bujar i kemi bashkë në mexhe te Bunari nga vitet e 70 dhe se babai ia krijojë atë pasuri. Thua se ne nuk kemi prindër e as vëllezër. Më tregoj mua se para dy jave ju ka pranuar statusi i veteranit të UCK-së, ky është kryetari i jonë” ka ironizuar Nevzati./rajonipress/