Nevzati: Çka është kjo ngutí në ditët e fundit të verdiktit të popullit – punë të kryera vetëm “sa për sy e faqe”?

Gjilan – Në vend se të planifikohen projekte të qëndrueshme dhe të menaxhohen me transparencë, qytetarëve po u serviren improvizime të shpejta që vetëm sa e thellojnë pakënaqësinë dhe humbjen e besimit ka shkruar Bujar Nevzati.

Postimi i plotë:

Reagim publik ndaj Qeverisjes Komunale

Të nderuar qytetarë,
Prej më shumë se 2 vitesh, sikurse shumica rrugëve të qytetit edhe rruga e Zabelit është shndërruar në shembullin më të keq të keqmenaxhimit komunal. Fillimisht, punimet për shtrimin e asfaltit nisën me shumë vonesë, e tash jemi dëshmitarë të një situate absurde: ditën po shtrohet asfalt, ndërsa natën po hiqet përsëri. Punëtorët e lodhur po përplasen me pasojat e vendimeve të paqarta e të papërgjegjshme, ndërsa qytetarët nuk kanë asnjë informacion zyrtar se çfarë po ndodh.

A ka ndonjë përfaqësues të Komunës që ka guximin të dalë para publikut dhe të sqarojë qytetarët? A ka kush përgjegjësi për këtë shpenzim të kotë të parasë publike dhe këtë gjendje të mjerueshme të rrugës?

Çka është kjo ngutí në ditët e fundit të verdiktit të popullit – punë të kryera vetëm “sa për sy e faqe”?

Në vend se të planifikohen projekte të qëndrueshme dhe të menaxhohen me transparencë, qytetarëve po u serviren improvizime të shpejta që vetëm sa e thellojnë pakënaqësinë dhe humbjen e besimit.

Kjo tregon qartë se Komuna është pa “zot shtëpie”: pa planifikim, pa mbikëqyrje dhe pa përgjegjësi. Nëse shkaku i këtij keqmenaxhimi është paniku nga humbja e zgjedhjeve, atëherë është edhe më e qartë se rruga drejt oborrit të Komunës është humbur bashkë me besimin e qytetarëve.

Ne kërkojmë sqarim publik dhe përgjegjësi të menjëhershme nga qeverisja komunale. Qytetarët kanë të drejtë të dinë çfarë po ndodh me projektet e tyre dhe si po shpenzohen mjetet e tyre./rajonipress/