Nevzadi: Zbatojeni vendimin për vendosjen e Muzeut të Qytetit

Gjilan – Rëndësia e projektit për Muzeun e Qytetit konsiston në krijimin e një adrese në Komunën e Gjilanit ku do të mund të paraqitet gjithë trashëgimia kulturore të kësaj ane, e poashtu edhe në edukimin kulturor të qytetarëve për trashëgiminë kulturore të qytetit dhe rrethinës sonë.

Veton Nevzadi ish drejtor i kulturës thotë se Komuna, respektivisht kryetari i komunës nuk do të duhej të vonohej aq shumë në zbatimin e vendimit të cilin e ka marrë sapo ka marrë timonin e komunës. “Premtimi i dhënë në Qendrën Multikulturore “Varg e Vi” (i nënshkruar) në praninë e komunitetit kulturor të Gjilanit kishte të bënte me një zbatim të shpejtë, e që do të ishte çështje ditësh pas marrjes së detyrës. Tash vendimi është marrë, por zbatimi i tij nuk duket askund” shton Nevzadi.

Sipas tij të gjitha punët procedurale janë të kryera gjatë vitit 2013 falë angazhimit të palodhshëm të Komisionit Komunal për Themelimin e Muzeut të Gjilanit. “Me këtë rast, do të duhej që dikush nga institucionet të falënderojë publikisht anëtarët e këtij komisioni në përbërje: Sherafedin Kadriu, Magbule Xhemaili, Faik Sahiti, Selvije Shefkiu dhe Enkelejda Arifi nën konsulencën shkencore të Fejaz Drançollit./rajonipress/