Nevzad Balë Kryeziu, patrioti nga Rogana që ra heroikisht duke mbrojtur pragun dhe lirinë e Kosovës

Kamenicë – Me dhimbje, krenari dhe respekt të thellë, familjarë, bashkëluftëtarë dhe qytetarë të Anamoravës kanë kujtuar 27-vjetorin e rënies heroike të Dëshmorit të Kombit, Nevzad Balë Kryeziu, një prej figurave më të njohura të rezistencës shqiptare në Roganë të Dardanës.

Nevzad Balë Kryeziu ishte ndër ata burra të rrallë të Kosovës që jetën nuk e matën me vitet që jetuan, por me sakrificën që dhanë për atdheun. Patriot i palëkundur, njeri i urtë dhe me shpirt të madh kombëtar, ai e jetoi tërë jetën me idealin e lirisë dhe të dinjitetit shqiptar. Në kohët më të vështira për popullin e Kosovës, kur pushteti serb ushtronte dhunë, terror dhe frikë mbi shqiptarët e pambrojtur, Nevzadi nuk u përkul dhe nuk u largua nga rruga e tij atdhetare.

Ai i përkiste brezit të burrave që besonin se liria nuk dhurohet, por fitohet me sakrificë, qëndresë dhe gjak. Shtëpia e tij u bë vatër e patriotizmit dhe mbështetje për Ushtrinë Çlirimtare të Kosovës, ndërsa vetë ai mbeti deri në frymën e fundit në mbrojtje të pragut, familjes dhe idealit kombëtar.

Më 11 maj 1999, në përballje me forcat serbe, Nevzad Balë Kryeziu zgjodhi të mos dorëzohej. Ai ra heroikisht përballë armikut, duke u bërë simbol i qëndresës dhe i flijimit për lirinë e Kosovës. Rënia e tij nuk ishte vetëm humbje për familjen dhe Roganën, por një akt i madh sakrifice që hyri përgjithmonë në historinë e lavdishme të popullit shqiptar.

Sot, emri i Nevzad Balë Kryeziut kujtohet me respekt dhe krenari si një hero i heshtur i Kosovës, një atdhetar që e deshi lirinë më shumë se jetën dhe që me gjakun e tij vulosi ëndrrën shekullore për Kosovën e lirë dhe të pavarur.

27 vjet nga rënia heroike e luftëtarit dhe patriotit nga Rogana e Dardanës

Me dhimbje, krenari dhe respekt të thellë, familjarë, bashkëluftëtarë dhe qytetarë të Anamoravës kanë kujtuar 27-vjetorin e rënies heroike të Dëshmorit të Kombit, Nevzad Balë Kryeziu, një prej figurave më të njohura të rezistencës shqiptare në Roganë të Dardanës.

Më 11 maj 1999, në kulmin e ofensivës së forcave serbe kundër popullsisë shqiptare në komunën e Kamenicës, Nevzad Kryeziu ra heroikisht gjatë përballjes me njësitë speciale serbe, duke mbrojtur familjen, pragun dhe idealin e lirisë. Shtëpia e tij, ashtu si shumë shtëpi të tjera shqiptare në Roganë, ishte vënë në shërbim të Ushtrisë Çlirimtare të Kosovës, çka e kishte bërë familjen Kryeziu objekt të drejtpërdrejtë të ndjekjes nga policia dhe ushtria serbe.

Dëshmitë e bashkëkohësve tregojnë se atë mëngjes të kobshëm të 11 majit 1999, Rogana ishte e rrethuar nga forca të shumta policore, ushtarake dhe paramilitare serbe. Objektivi kryesor ishte arrestimi ose eliminimi i aktivistëve dhe familjeve që mbështesnin UÇK-në. Në mesin e tyre ishte edhe Nevzad Balë Kryeziu, i njohur për qëndrimin e tij të palëkundur patriotik dhe për mbështetjen e vazhdueshme ndaj çështjes kombëtare.

Sipas rrëfimeve të familjarëve dhe bashkëluftëtarëve, oficerët serbë kërkonin që ai të dorëzohej dhe të tregonte vendndodhjen e djemve të tij, të angazhuar në radhët e UÇK-së. Por Nevzadi refuzoi kategorikisht.

“Unë nuk kam fëmijë për ju dhe as lirinë time nuk mund t’ua jap”, thuhet të ketë qenë përgjigjja e tij para forcave serbe.

Pak çaste më pas, në një përleshje të drejtpërdrejtë me policinë dhe ushtrinë serbe, Nevzad Balë Kryeziu mbeti i vrarë nga plumbat, duke u shndërruar në simbol të qëndresës dhe sakrificës për lirinë e Kosovës.

Një jetë e tërë në shërbim të atdheut

Nevzad Kryeziu u lind në vitin 1936 në Roganë. Edhe pse rrethanat ekonomike dhe familjare ia ndërprenë shkollimin herët, ai mbeti gjatë gjithë jetës një njeri me vetëdije të lartë kombëtare dhe me etje të madhe për dije, arsim dhe liri.

Ai u rrit në konakun e njohur të Balë Gecit, një familje me traditë mikpritjeje dhe atdhetarie në Roganë. Pikërisht aty, siç kishte rrëfyer vetë Nevzadi sa ishte gjallë, e kishte dëgjuar për herë të parë fjalën “liri”, shumë kohë para se të shkonte në shkollë.

Jeta e tij u shënua nga përballjet me represionin serb, nga aksionet famëkeqe të armëve, bastisjet dhe ndjekjet politike, por ai nuk u tërhoq asnjëherë nga ideali kombëtar.

Bashkëfshatarët e kujtojnë si një njeri të urtë, punëtor dhe me shpirt të madh, i cili besonte se populli shqiptar mund t’i këpuste prangat e robërisë vetëm përmes arsimit, unitetit dhe sakrificës.

Familja Kryeziu, në krah të UÇK-së

Në vitet e luftës, Nevzad Kryeziu dhe familja e tij u rreshtuan hapur në mbështetje të Ushtrisë Çlirimtare të Kosovës. Tre djemtë e tij u mobilizuan në radhët e UÇK-së, ndërsa shtëpia e familjes shërbeu si bazë dhe strehë për luftëtarët e lirisë.

Për këtë arsye, familja Kryeziu ishte vazhdimisht nën vëzhgim dhe kërcënim nga forcat serbe.

Pavarësisht rrezikut të madh, Nevzadi nuk pranoi të largohej nga shtëpia e tij. Ai vendosi të qëndrojë dhe të përballet me armikun, duke e konsideruar këtë si borxh ndaj flamurit dhe Kosovës.

Rogana vendi që dha dhjetëra martirë për liri

Rogana e Dardanës mbetet një nga fshatrat me kontribut të madh në historinë e rezistencës shqiptare. Në një hark kohor prej më shumë se një shekulli, ky fshat ka dhënë dhjetëra luftëtarë dhe dëshmorë për lirinë e Kosovës.

Sot, banorët e Roganës kujtojnë me krenari figurën e Nevzad Balë Kryeziut, duke e cilësuar atë si një hero të veçantë, një njeri që jetoi me dhimbjet dhe ëndrrat e popullit të tij dhe që në fund zgjodhi të bjerë përballë armikut, pa e ulur kokën.

“Lavdi xha Nevzadit! I përjetshëm qoftë kujtimi për të”, është mesazhi që përcillet çdo vit nga familjarët dhe bashkëluftëtarët e tij në përvjetorin e rënies heroike./rajonipress/