Nëpërmes Trupit Koordinues shteti ka investuar më tepër se 70 milion € në Luginë

Medvegjë – Për 14 vjet të ekzistimit të Trupit Koordinues për komunat Preshevë, Bujanoc dhe Medvegjë, shteti në infrastrukturën e këtyre komunave multietnike ka investuar më tepër se 70 milion euro, shkruan e përditshmja “Veçerrnje Novosti”.

Me ndërmjetësimin e donatorëve të huaj, për zhvillimin e këtyre komunave janë investuar edhe 35 milion euro, ndërsa këtë vit shteti gjithashtu nëpërmes këtij Trupi ka siguruar 246 milion dinarë, që paraqet rritje prej 9% në krahasim me vitin e kaluar, citohet të ketë thënë Zoran Stankoviq, kryetari i Trupit Koordinues.

Stankoviq nuk ka përjashtuar ekzistimin e problemeve politike, por ka shtuar se këto çështje do të zgjidhen nga shtatori nëpërmes kërkesave të shqiptarëve të sistemuara në shtatë pikë.

Sipas kryetarit të Trupit Koordinues, politika shtetërore e cila zbatohet është e drejtuar kah përmirësimi i gjendjes ekonomike.

Ndonëse deputetët shqiptarë të Luginës, Riza Halimi dhe Shaip Kamberi disa ditë më parë kanë kërkuar nga kryeministri serb Alleksandar Vuçiq shkarkimin e kryetarit aktual Stankoviq, ky i fundit nuk ka dashur të komentojë këtë për siç ka thënë ai “arësye profesionale”. (mepress.info)