Nëna kështu më tha

Poezi nga Demush Mehmeti

Në të gjashtën javë pasi të linda
Kur ta zgjidhja lulakun
Ti hiqja pelenat
Shtriheshe gjëmoje si i madh

Ne atëherë
Sen mbi shpirt s’kishim
Por zoti ju falte të shëndosh si molla
Të bukur si drita
Nëna kështu më tha

Gjashtë vite kur i kishe
Ulëshe këmbët kryq flisje si burrë
Herët i pate ra brisk fytyrës

Ju sa herët u pjekët
Nga gjithë ajo jetë shumë e rëndë
Nga shpresa e vullneti i madh.

KOT

Kot më fton
Në parajsën tënde të premtuar
Unë mirë e njoh
Nuk e dua

Ti më je vet djalli
Ikë
Më le të qetë
Le të digjem në ferrin tim të merituar

Ky ferr i imi
Errësirë ferr për ty
Si e dua
Parajsë e shndritshme për mua !.

KUSH PREKË

Kush prekë
Në plagën time të pambyllur
Mallkimi e vraftë
I humbtë fara
Krejt fare daltë !….

JEPI PAK

Hajde ecë vet
Jepi pak
Mos lejo të të tërheqin

Zvarrë mos u zvarrit
Ecë vertikal

Ecë
Po nuk munde si e sa duhet
Ecë si mundësh
Si duhet

Ecë vazhdo
Në rrugën që s’ndalon
Mos u ndal

HALLALL

Hallall gjiri i nënës sate
Hallall

Ty që flet qartë
Dhe me fund të barkut
Hallall

Hallall
Për fjalët që thua
Ngrohura në zjarr zemre
Dashuri
Kthjellur e ndritur në tru !

TI VARGU IM

Më falë ti vargu im i shqetësuar
Më falë
Po shprehem e lozi me ty
Me këto dertet e mia si shumë po të rëndoj
Më falë

Për çdo ditë
E shenjta dashuria ime noton në ty
Në më të trazuarin detin tënd të pa anë
Noton

Në ty vargu im
Notojnë
Të gjitha dhimbjet dhe brengat
Që s’ju bëhet ballë
Notojnë

Në ty shkrydhen
Dhe gjitha të ligat e botës
Si hamshor patredhur në lamën e shtrua
Me kallijt e drithit të bardhë
Shkrydhen..