Në UBT duan të studiojnë të gjithë – kërkesa të shumta për transferim

Erna Buçaj është njëra nga shumë studentët, e cila vitin e kaluar akademik është transferuar nga Universiteti i Prishtinës në UBT. Ajo tani ndjek ligjëratat në Fakultetin Juridik të UBT-së. Erna tregon se janë shumë arsyeje që e kanë shtyrë të zgjedhë UBT-në për t’i vazhduar studimet. Ajo thotë se UBT ka programe unike të studimeve në nivelin bachelor e master, shumica prej të cilave nuk ofrohen në institucione të tjera.

“UBT e ka programin më të mirë në krahasim me fakultetin ku i kam zhvilluar studimet. UBT mundëson pjesëmarrje në ligjërata, komunikimin profesor – student etj. Gjithashtu, krijon mundësi projekte e prezantime të shumta”, thotë Erna, duke e ditur se UBT është urë lidhëse me shumë universitete të tjera ndërkombëtare dhe i mundëson asaj dhe shumë të tjerëve studime jashtë vendit. Në UBT, aktualisht vazhdon procesi i transferimeve të studentëve nga universitetet dhe kolegjet e tjera për përfundim të studimeve. Drejtues të UBT-së deklarojnë se deri tashti ka pasur interesim të jashtëzakonshëm të studentëve për t’i vazhduar studimet në UBT.

“Profesionalizmi dhe cilësia maten nga dëshira e studentëve për të vazhduar studimet në UBT. Deri tani, mbi 200 studentë kanë aplikuar për transferim”, tregoi rektori i UBT-së, Edmond Hajrizi, duke shtuar se UBT ka partneritet me më shumë se 250 universitete dhe institucione prestigjioze, vendore e ndërkombëtare, “përmes të cilëve ofrohen mundësi të studimit jashtë vendit”. “Studimin në UBT e bën akoma më tërheqës anëtarësimi në institucione prestigjioze ndërkombëtare, duke përfshirë EOQ-në, IPMA-në, IFAC-in, ITA-në etj., si dhe vlerësimi me çmimet më të larta vendore e ndërkombëtare për cilësi“, ka vijuar rektori Hajrizi.

Sipas procedurave të transferimit, hapi i parë që duhet ta bëjë çdo student, i cili do të kërkojë të ndjekë programet e të njëjtit cikël në UBT, është plotësimi i formularit për aplikim, me kushtin që studentët të kenë të përfunduar së paku një provim në njërin prej institucioneve shtetërore apo private të arsimit të lartë në Kosovë.

Afati i fundit për pranimin e dokumentacionit për transferim të studimeve është 28 shkurti. Sipas Udhëzimit të UBT-së, aplikimi duhet të bëhet individualisht, në zyrën e administratës e në Rektoratin e UBT-së. Studentët e interesuar nuk e kanë nevojshme të marrin leje nga institucionet ku studiojnë./rajonipress/