Në Skifteraj ndërtohet ura që lidh pronat e bujqëve të disa lokaliteteve për rreth

Viti – Në fshatin Skifteraj, kanë filluar punimet në ndërtimin e urës bujqësore, në trekëndëshin që lidh pronat e bujqëve të fshatrave Radivojc, Skifteraj, Budrikë, Ballancë e Zhiti. Kjo urë, do të mundësoj bujqëve të këtyre lokaliteteve qasje më të mirë në punimin e tokave të tyre, pasi që deri më tani, ata janë përballuar me vështirësi në qarkullim, duke kaluar në një distancë të largët, mu për shkak të mungesës së urës.

Gjatë vizitës që kryetari i komunës Sokol Haliti i bëri punimeve në ndërtimin e kësaj ure, takoi edhe banorët e fshatrave të cilët edhe shprehën falënderim për këtë investim, duke e vlerësuar si shumë të nevojshëm.

Po ashtu, kryetari Haliti ka vizituar edhe rrugët e asfaltuara ditë më parë në disa lagje të fshatit Skifteraj si ato të anekseve 1,2,3 dhe 4 të rrugës së xhamisë, aneksi i rrugës “Kenan Halimi”, si dhe degëzimi i rrugës “21 shtatori” dhe asaj “Flakadani i Lirisë”.

Ndryshe, në fshatin Skifteraj është duke u përgatitur për asfaltim edhe rruga që shpie për në Stubëll të ulët./rajonipress/