Në pritje të parave të mërgimtarëve

Nga 1 janari deri më 31 mars në buxhetin e Maqedonisë janë grumbulluar 525 milionë euro para nga tatimet dhe kontributet e tjera, ndërsa për të njëjtën periudhë janë harxhuar 705 milionë euro, që do të thotë se arkës shtetëror i mungojnë 180 milionë euro, të cilat parashiheshin të realizohen nga të ardhurat në buxhet.

Mbulimi i këtij minusi në buxhet mund ta kompensojnë remitencat, si dhe ardhja e mërgimtarëve për pushimet e verës në vendlindje.

“Lëvizja te numri i të punësuarve dhe i brutoprodhimit vendës sollën deri te zvogëlimi i produktivitetit në ekonominë e vendit në tremujorin e katërt. Në bazë vjetore rënia e produktivitetit është 1.3 për qind, edhe në tremujorin e fundit është 1.3 për qind. Si rrjedhojë, harxhimet e punës për njësi prodhimi shënojnë rritje në tremujorin e fundit të 2013-tës prej 2 për qind edhe në nivel tremujori, por edhe në nivel vjetor”, thuhet në raportin e fundit të Bankës Popullore të Maqedonisë.

“Kjo qeveri e ka shumë të qartë se tre muajt e verës në vendlindje vijnë mërgimtarët dhe harxhimet që ata i bëjnë për konsum të përgjithshëm dukshëm ndikojnë në përmirësimin e të hyrave në buxhet. Mirëpo, pavarësisht se remitencat dhe ardhja e mërgimtarëve luajnë rol pozitiv në mbushjen e buxhetit, megjithatë nëse sërish nuk realizohen projektimet e bëra nga Qeveria apo deficiti fiskal të mos jetë më i lartë se 3.5 për qind nga Bruto Prodhimi Vendor, atëherë opsioni i vetëm do të ishte rishikimi i buxhetit që njëherësh do të thotë edhe ndryshim i shkallës së deficitit fiskal”, thotë për gazetën Koha të Shkupit Besnik Fetahu, profesor universitar.

albinfo.ch