Në pritje të koalicionit

Lufta për koalicione qeverisëse ka nisur në kohë lufte. Dhe, atëkohë marrëveshja për atë që quhej “Qeveri e unitetit” nuk është bërë as në Kosovë dhe as me ndërmjetësimin e kosovarëve – është bërë në Rambuillet, nën trysninë ndërkombëtare.

Ka qenë fundi i shkurtit të 1999-s kur forcat kryesore politike të asaj kohe dhe krahu politik i UÇK-së kishin rënë dakord në këtë qytezë të Francës për të krijuar një qeveri të përkohshme që do të drejtohej nga Hashim Thaçi, shkruan Koha Ditore.

E kishin bërë, krahas negociatave që patën zhvilluar me delegacionin e Serbisë për ndaljen e luftimeve dhe gjetjen e një zgjidhjeje. Thaçi përfaqësonte UÇK-në. Në Rambuillet drejtonte edhe delegacionin e Kosovës në bisedimet me Serbinë.