Në mesudhë
Poezi nga Bilall Maliqi
Shtriva këmbën ta arrij të pazëshmën pikë
Aty ku derdhen ngulfatshëm qindra kujtime
Hap im i madh s’i zuri centimetrat e fundit
Ajo shkëputje ngeli sikur sinkopa pas këngës
Ajo pikë mbeti e pashkelur nga këmba ime
Me shputën e përbaltur nga kohët e pista
Ngela në mesudhë me shikim kah ai cak
Me dëshirat e (sh)këputura si me gërshërë
Vras mendjen ta përpij sall me një shikim
Atë gurë që lodhshëm të tërin më zvetënon
Këmba më është ngrirë sikur një hap i ndalur
Drejt asaj pike që mbin e rritet kujtimi për Ty
(27.08.2019)