Në Kosovë, cilësia e naftës nuk kontrollohet as 3 për qind

Një sasi e vogël e derivateve të naftës që importohet nga vende të ndryshme të Evropës në Kosovë, i nënshtrohet kontrollit për cilësi në dogana, kështu që ky produkt vazhdon të jetë i dyshimtë, sepse nuk kontrollohet as 3 %.

Kështu ka thënë për Indeksonline, përfaqësues të Shoqatës se Naftëtarëve të Kosovës.

Fadil Berjani, udhëheqës i kësaj shoqate tha se as tre për qind e derivateve që hyjnë në Kosovë, nuk i nënshtrohen kontrollit për cilësi, pavarësisht faktit se kjo çështje, sipas tij,është obligim sipas ligjeve në fuqi.

“Kontrollimi i cilësisë në Kosovë është obligim. Brenda 24 orësh në Kosovë minimum hyjnë 1.5 milion litra derivate, kurse vetëm rreth tre për qind kontrollohet cilësia. Ministria e Tregtisë dhe Industrisë nuk ka pasur interes që ta kontrollon cilësinë, e cila nuk kontrollohet as 3 %, vetëm letrat lexohen dhe leshohet qertifika fallco e cilesisë pa i kontrolluar fare”, ka thenë Berjani.

Cilësia e Produkteve të Naftës, nënkupton vlerat e përcaktuara të përbërësve dhe treguesve të cilësisë përmes legjislacionit për produktet e naftës në përputhje me standardet evropiane.

Sipas ligjeve në fuqi, subjekti që është i licencuar për shitjen më shumicë dhe ka kryer mashtrim në cilësinë e naftës dhe produkteve të saj, i shqiptohet gjoba nga 30 deri në 60 mijë euro, kurse personi përgjegjës që ka blerë këtë naftë dhe shet në pikat e karburanteve, gjobitet në shumën prej 5 deri në 10 mijë euro./Indeksonline/