Në Kamenicë ndahen mirënjohje për gratë që kanë dhënë kontribut në fusha të ndryshme

Kamenicë – Drejtoresha e Drejtorisë për Zhvillim Ekonomik dhe Diasporë, Burbuqe Leka, ka ndarë mirënjohje për gratë që kanë dhënë kontribut në fusha të ndryshme siç janë shëndetësia, policia, administrate komunale, arsimi dhe biznesi.

Drejtoresha Leka ka thënë se në një ceremoni të mbushur me atmosferë të jashtëzakonshme kanë qenë të pranishme gra që kanë punuar me pasion dhe përkushtim e disa prej të cilave janë tashmë pensioniste, por që e kanë lënë një shenjë të paharrueshme në çdo sektor ku kanë vepruar.

“Si drejtoreshë për zhvillim ekonomik dhe kryesuese e grupit të grave, është një kënaqësi e veçantë të mund të festojmë së bashku fuqinë dhe kontributin e jashtëzakonshëm të grave në shoqërinë tonë. Faleminderit çdo gruaje që ka dhënë një kontribut të vlefshëm dhe vazhdon të jetë një shembull i forcës, qëndresës dhe dashurisë për punën dhe familjen”, ka thënë Leka./rajonipress/