Në Kamenicë mbahet konsultimi publik për draft-planin e riintegrimit të personave të riatdhesuar dhe Integrimit të të huajve

Kamenicë – Në Komunën e Kamenicës është mbajtur konsultimi publik për Draft-Planin Komunal për Riintegrimin e Qëndrueshëm të Personave të Riatdhesuar dhe Integrimin e të Huajve për periudhën 2026–2028.

Takimi u organizua nga grupi punues përgjegjës për hartimin e këtij dokumenti strategjik, ndërsa kryesuesi i grupit, Zijadin Thaqi, prezantoi para të pranishmëve objektivat dhe rëndësinë e planit për zbatimin e politikave të migrimit dhe riintegrimit në nivel lokal.

Sipas tij, hartimi i planeve komunale për riintegrim të qëndrueshëm është paraparë në kuadër të Strategjisë për Migrim 2026–2028 dhe synon koordinimin institucional për mbështetjen e personave të riatdhesuar dhe integrimin e të huajve në komunitet.

“Në bashkëpunim me drejtoritë komunale, organizatat vendore dhe ndërkombëtare, si dhe institucionet qendrore përgjegjëse për migrim dhe riintegrim, është hartuar një plan gjithëpërfshirës që adreson nevojat konkrete të personave të riatdhesuar në Komunën e Kamenicës”, u tha gjatë prezantimit.

Draft-dokumenti përfshin objektiva konkrete, aktivitete të planifikuara, institucionet përgjegjëse për zbatim, afatet kohore, koston financiare dhe indikatorët matës për realizimin e planit.

Sipas dokumentit, plani është hartuar në përputhje me Strategjinë për Migrim, rregulloret qeveritare për riintegrimin e personave të riatdhesuar dhe integrimin e të huajve, si dhe në bashkëpunim të ngushtë me institucionet relevante në nivel qendror.

Përfaqësuesit komunalë theksuan se ky plan synon të krijojë mekanizma më efikas për integrimin social dhe ekonomik të personave të riatdhesuar, duke mundësuar qasje më të lehtë në shërbime publike, arsim, punësim dhe mbështetje institucionale në komunë./rajonipress/