Në Kamenicë diskutohet për sigurinë në shkolla

Kamenicë – Policia e Kosovës, konkretisht stacioni policor në Kamenicë ka organizuar tryezë lidhur me çështjen e sigurisë në shkolla. Në këtë tryezë u diskutua se njëra ndër elementet kyçe në institucionet shkollore është çështja e sigurisë, në mënyrë që nxënësit por edhe mësimdhënësit të ndjehen të lirë e të pa cenuar nga të tjerët.

Të pranishëm në tryezë ishin kryetari i Komunës së Kamenicës, Qëndron Kastrati, komandanti i Policisë në Kamenicë, Florim Klaiqi, zëvendes drejtori rajonal, Nënkolonel Shaban Azizi, drejtoresha Komunale e Arsimit, Mirhane Morina-Bislimi, përfaqësues nga Këshilli i Prindërve e Këshilli i Nxënësve, përfaqësuesja nga Njësia për Mbrojtjen e të Drejtave dhe Lirive të Njeriut, Nazmije Demolli, drejtorët e shkollave të mesme, si dhe psikologet e pedagogët e shkollave.

Kryetari Kastrati ka thënë se siguria në shkolla është njëra ndër elementet kryesore për një zhvillim cilësor të arsimit të nxënësve.
“Kur nxënësit ndjehen të lirë në objektet shkollore, pa u kërcënuar si dhe pa u cenuar siguria e tyre, atëherë edhe prindërit ndjehen më të sigurtë për fëmijët e tyre. Në bashkëpunim me Policinë në Kamenicë, ne do të punojmë që e siguria e nxënësve tanë dhe e mësimdhënësve të jetë në nivel, në mënyrë që arsimimi i tyre të cilësor dhe të mos cenohet nga askush”, është shprehur Kastrati.

Edhe Komandanti i Policisë në Kamenicë, Florim Klaiqi, ka thënë se policia është e gatshme që të kujdeset për sigurinë e secilit e në veçanti të nxënësve dhe mësimdhënësve.
“Policia kujdeset për mbajtjen e rendit dhe sigurisë në vend. Ne çdoherë inkurajojmë të gjithë që janë të kërcënuar të lajmërojnë rastet në polici, në mënyrë që ne të gjejmë zgjidhje për mbrojtjen e tyre. Jemi të gatshëm që sigurinë e nxënësve në shkolla ta mbikëqyrim, në mënyrë që ata të ndjehen të lirë dhe të sigurtë”, theksoi ai.

Në anën tjetër zëvendës drejtori rajonal, Nënkolonel Shaban Azizi, duke sqaruar strategjinë për çështjen e sigurisë në shkolla ka përmendur aplikacionin online për lajmërimin e rasteve.
“Bashkëpunimi i policisë me drejtorët, mësimdhënësit e nxënësit, ndikon në çështjen e sigurisë në shkolla. Tani është lansuar edhe aplikacioni “Lajmëro Policinë”, ku mund ta shkarkoni dhe aty t’i raportoni të gjitha rastet të cilat cenojnë sigurinë në shkolla. Jemi të gatshëm të ndërhyjmë në secilin rast ku nevojitet ndihma jonë”, theksoi ai.

Po ashtu Këshilli i Prindërve dhe Këshilli i Nxënësve, së bashku me drejtorët, psikologët dhe pedagogët e shkollave, në këtë takim ishin të mendimit së ambienti më i sigurt shkollor, u ofron nxënësve komoditet të ndjehen më të lirë, dhe se sipas tyre në këtë mënyrë edhe arsimi do të jetë më cilësor./rajonipress/