Në Kamenicë breshëri, shiu e rrufeja shkaktojnë dëme të konsiderueshme

Kamenicë – Ramadan Berisha nga drejtoria për mbrojtje dhe shpëtim në Kamenicë tha për rajonipress se dëmet në Komunën e Kamenicës pas reshjeve të shiut, breshrit e rrufesë janë të konsiderueshme.

Ramadan Berisha thotë se shiu dhe breshëri që përfshiu Kamenicën dhe fshatrat e saja përreth pos viktimave në njerëz që fatmirësisht nuk ka pasur, dëmet tjera janë të shumta. “Dëmet janë katastrofale, sidomos në bujqësi, por edhe nga rrufeja janë shkaktuar dëme dhe ndezje të shtallave dhe të një shtëpie në fshatin Busavatë. Fshati Petrovc ka qenë i bllokuar tërësisht mirëpo me angazhimin e drejtorisë për mbrojtje dhe shpëtim kemi intervenuar me makinerinë e kompanisë që mirëmban rrugët dhe ato shpejt janë bërë të kalueshme”.

Berisha tha se dëmet janë të mëdha edhe në qytet ku janë dëmtuar të gjitha pemishtet, baqet dhe ka pasur dëmtime të automjeteve nga breshëri kurse uji i rrëmbyeshëm ka depërtuar në shumë objekte banimi./rajonipress/