Në Gjilan të enjten fillon faza e dytë e dezinsektimit hapësinor‏

Gjilan – Komuna e Gjilanit gjatë ditës së nesërme fillon me fazën e dytë të dezinsektimit hapësinor për eliminimin e insekteve të cilat janë pengesë për qytetarët, veçanërisht gjatë kohëve të nxehta të verës, kur edhe lajmërohen në hapësirë gjithandej insekte të ndryshme, për të cilat është i domosdoshëm ky intervenim i kësaj natyre.

Me këtë rast drejtori i Drejtorisë së Shëndetësisë dhe Mirëqenies Sociale, Nexhat Hajrullahu, ka thënë se pas fazës së parë e cila është kryer gjatë muajit qershor, vazhdon faza e dytë dezinsektimit.

“Faza e parë e dezinsektimit është kryer gjatë muajit qershor, dhe kështu do të vazhdojmë edhe me fazën e dytë të këtij procesi. Gjendja në terren është përmirësuar menjëherë pas intervenimit të fazës së parë, por do të vazhdojmë konform kontratës edhe me fazën e dytë dhe të gjitha fazat tjera të cilat janë të parapara. I kemi tashmë prej kohësh të evidentuara edhe pikat më të ndjeshme që kërkojnë intervenim të menjëhershëm dhe gjatë ditës së nesërme, konkretisht në orën 20:00 të mbrëmjes për të vazhduar dy ditë me radhë”, ka thënë drejtori Hajrullahu.

Hajrullahu ka apeluar tek të gjithë bletarët, që për dy ditët e ardhshme t’i mbajnë të mbyllura bletët, ngase materia me të cilën bëhet dezinsektimi, mund të shkaktoj dëme në shoqëritë e bletëve./rajonipress/