Në Gjilan shënohet simbolikisht Dita e Pavarësisë së SHBA-ve

Gjilan – Komuna e Gjilanit për nderë të Ditës së Pavarësisë së Shteteve të Bashkuara të Amerikës, së bashku edhe me “Miqtë e Amerikës”, ka organizuar sot simbolikisht një koktej rasti me përfaqësues të ndryshëm nga jeta politike, shoqërore, kulturore, me përfaqësues të sigurisë, përfaqësues të ndryshëm vendor e ndërkombëtare, për të dhënë edhe nga kjo pjesë e Kosovës një mesazh urimi dhe feste për Shtetet e Bashkuara të Amerikës, si vend që për çdo moment punon dhe transmeton paqe dhe demokraci në gjithë vendet e ndryshme të botës së mbar.

Në këtë ngjarje kryetari i Komunës, Qemajl Mustafa, ka uruar SHBA-të në përvjetorin e ditës së pavarësisë së tyre, njëkohësisht ka falënderuar për përkrahjen e dhënë për Kosovën në dekadat e fundit dhe viteve të mëhershme, duke theksuar në mënyrë telegrafike mbështetjen e vazhdueshme nëpër shumë procese të rëndësishme për vendin tonë dhe shtetet në tranzicion në rajonin tonë dhe në përgjithësi në gjithë botën ku kishte këso probleme për të mbjellur demokracinë të cilën e kanë përqafuar pothuajse numri më i madh i vendeve në rruzullin tokësor.

Ndërsa nga shoqata “Miqtë e Amerikës”, Ardian Rexhepi, ka falënderuar kryetarin Mustafa për mbështetjen dhe bashkëpunimin e vazhdueshëm. Ai është ndjerë shumë i gëzuar edhe për atë që SHBA-të kanë bërë për lirinë e shtetit të Kosovës, i cili tashmë ka një rrugë të trasuar për integrimet në familjen e madhe të shteteve demokratike.

Shoqata “Miqtë e Amerikës” i ka ndarë një mirënjohje në shenjë falënderimi, të tretën të kësaj natyre, kryetarit të Komunës Qemajl Mustafa për bashkëpunimin e ofruar./rajonipress/