Në Gjilan shënohet 20-vjetori i themelimit të Shoqatës së të Verbërve

Gjilan – Është shënuar në Gjilan 20-vjetori i themelimit të Shoqatës së së Verbërve, e cila është bërë nën përkujdesjen e kryetarit, Lutfi Haziri.

Në këtë ngjarje, ka marrë pjesë nënkryetari Arbër Ismajli, drejtori i Shëndetësisë, Selami Xhemaili, kryetari i Shoqatës së të Verbërve në Gjilan, Bajram Spahiu, kryetari i Këshillit të Bashkësisë Islame në Gjilan, Naim Aliu, menaxheri i Handikos në Gjilan, Fatmir Shurdhani e përfaqësues të tjerë.

Në fjalën e rastit, kryetari i Shoqatës së të Verbërve në Gjilan, Bajram Spahiu, e ka falënderuar kryetarin Haziri për organizimin e kësaj ngjarje dhe për mbështetjen e vazhdueshme të ofruar për këtë kategori të shoqërisë.

“Dua t’ju falënderojmë përzemërsisht për krejt mbështetjen që e kemi pasur në këto 20 vite, në realizimin e të drejtave tona, si në aspektin ligjor, po ashtu edhe aspektin e realizimit të aktiviteteve, të cilat kanë qenë udhërrëfyes për t’i mbërrirë qëllimet tona. Ne si komunitet e kemi një ëndërr, që një ditë komuniteti me aftësi të kufizuar të mos jetë më barrë e shoqërisë, por të jetë i aftë, i pavarur dhe i zoti për vete dhe familjet e tyre”, ka thënë Spahiu.

Drejtori i Shëndetësisë dhe Mirëqenies Sociale në Gjilan, Selami Xhemaili, në emër të kryetarit Haziri, i ka uruar kësaj shoqate 20-vjetorin e themelimit, sikurse që i ka përgëzuar për punën dhe aktivitetet e tyre.

“Ju sigurojmë që ne si institucione do të vazhdojmë t’ju mbështesim në projektet dhe kërkesat tuaja me të gjitha kapacitetet tona komunale, për personat me aftësi të kufizuara e për shoqatat e tyre”, ka thënë Xhemaili.

Në këtë ngjarje ka folur edhe kryetari i Forumit të Personave me Aftësi të Kufizuara, Bujar Kadriu, drejtori i Administratës së Përgjithshme të Shoqatës së të Verbërve të Kosovës, Mexhit Foniqi, drejtori i Qendrës burimore për mësim dhe këshillim në shkollën “Xheladin Deda” në Pejë, Xhavit Kastrati dhe kryetari i Këshillit të Bashkësisë Islame në Gjilan, Naim Aliu.

Në fund, janë ndarë mirënjohje falënderimi për avancimin e të drejtave të të verbërve të Gjilanit./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).