Në Gjilan mbahet akademia për 55-vjetorin e demonstratave të vitit 1968

Gjilan – Nën përkujdesjen e kryetarit të Komunës së Gjilanit, Alban Hyseni, sot është mbajtur akademia për 55-vjetorin e demonstratave të vitit 1968, në ngjarjen ku mori pjesë nënkryetarja Leonora Morina – Bunjaku, drejtorët komunalë, organizatorët e këtyre demonstratave dhe qytetarët.

Nënkryetarja e Gjilanit, Leonora Morina – Bunjaku, tha se ngjarjet e vitit 1968 ishin shpërthim i parë i demostrimit të hapur për kërkesat tona politike, kombëtare e njerëzore.

“Ngjarjet e vitit 1968 ishin shpërthim i parë i demostrimit të hapur për kërkesat tona politike, kombëtare e njerëzore. Praktikisht, këto ishin demonstratat e para në shtetet e lindjes komuniste. Në nëntorin e madh u dëshmua se te shqiptarët në Kosovë dhe në trevat tjera etnike shqiptare në ish-Jugosllavi, nuk
është plotësuar ende asgjë nga e drejta kombëtare në drejtim të aspiratës dhe ndjenjës kombëtare për liri e pavarësi”, theksoi ajo.

“Më 27 nëntor 1968, studentët shqiptarë në Prishtinë, Ferizaj, Gjilan e Podujevë, thyen tabunë e të demostruarit masiv në shtetin komunist jugosllav. Më 11 mars 1981, në Prishtinë, studentët me simbolikën e përmbysjes së pjatës, filluan rrënimin e sistemit komunist në ish-Jugosllavi. Studentët shqiptarë më 1 tetor 1997 protestuan në Prishtinë kundër dhunës serbe dhe prishën rehatinë e politikës paqësore. Më 28 nëntor 1997 dalja publike e UÇK-së, dëshmoi rezistencën e veprimit ushtarak dhe përcaktimit drejt çlirimit në qershor 1999”, ka theksuar tutje nënkryetarja e Komunës së Gjilanit.

Ajo tha se mbetet ta zhvillojmë dhe ndërtojmë vendin sepse gjaku i dëshmorëve dhe rezistenca prej viteve ’50 deri më tani do të thotë shumë për një histori.
“Ne duhet ta ruajmë, ta mbrojmë dhe të jemi të bashkuar për ta ndërtuar dhe zhvilluar vendin tonë”, ka thënë nënkryetarja Morina-Bunjaku.
Në këtë akademi, para te pranishmëve, kanë folur edhe organizatorët e këtyre demonstratave të vitit 1968 në Gjilan./rajonipress/