Në fund të javës pritet riformatimi i qeverisjes aktuale, priten ndërrime e ndryshime

Gjilan – Në fund të kësaj jave kabineti i Lutfi Hazirit pritet të pësojë ndryshime. Sipas burimeve tona ndryshime pritet të ndodhin në zyrën e prokurimit, në inspeksion, në buxhet dhe financa, në drejtorinë për pronë e kadastër. Ndërrime e ndryshime pritet të ndodhin edhe tek shefat e zyreve. Lutfi Haziri për rajonipress nuk i ka mohuar këto ndryshime, derisa ka thënë se po punon ta bëjë realitet Koalicionin e madh për Gjilanin.

Fundi i javës që po vije pritet të jetë i nxehtë dhe i sikletshëm për drejtorët e shefat e qeverisë komunale. Tashmë kreu komunal Lutfi Haziri ka paralajmëruar se është në fund të riformatimit duke synuar koalicionin e madh për Gjilanin raporton rajonipress.

Haziri i kontaktuar nga rajonipress nuk i ka mohuar këto ndryshime e ndërrime.”Kam përfunduar evaluimin dhe priten ndryshime në strukturën e drejtorëve, por mund të ketë ndërrime edhe tek shefat e zyreve” tha shkurt Haziri.

Sipas burimeve të besueshme të rajonipress Haziri në takimet e fundit të Bordit të Drejtorëve ka qenë shumë i ashpër për mos punën e ekipit të tij. Mësohet se tashmë Haziri i ka dërguar vërejtje edhe Salih Kqikut përgjegjës në zyrën e prokurimit. Haziri ndryshime ka paralajmëruar në drejtorin e inspeksionit, atë të prokurimit, buxhetit, në kadastër e pronë.

Gjithnjë sipas këtyre burimeve Haziri ka thënë se nuk do të tolerojë neglizhencë në punë.”Tolerancë zero ndaj të gjithë atyre që nuk i kanë kryer me përgjegjësi detyrat” ka thënë Haziri në takimet e bordit të drejtorëve.

Haziri ka thënë se drejtorët do të vlerësohen sipas performancës meqë ai tashmë i ka në dorë të gjitha vlerësimet edhe për drejtorët edhe për shefat e zyreve citon burimi i sigurt i rajonipress.

Gjithashtu Haziri në takimet që ka pasur me këshilltarët e tij ka folur edhe për mundësinë e krijimit të Koalicionit të madh për Gjilanin. Haziri ka thënë se do të bisedojë me të gjitha partitë politike në Kuvend për ta rikonfirmuar Koalicionin e Madh për Gjilanin./rajonipress/