Në ditën e çlirimit, inaugurohet shetitorja e re Gjilanit

Gjilan – Pikërisht në ditën e çlirimit, është inauguruar shetitorja e re e Gjilanit mbi lumin Mirusha.

Kryetari i Gjilanit, Lutfi Haziri, në ceremoninë e inaugurimit, tha se ky është një rikthim i memories për gjilanasit.

“Ky është njëri nga projektet që kemi dashur ta kthejmë në gëzim të çlirimit, për shkak se ky ka qenë problem më i madh që e ka përcjellë Gjilanin tash e 50 vjet. Rikthimi në rrugë dhe në çarshi të vjetër të Gjilanit, është rikthim i memories për gjilanasit. Në këtë shesh, jo vetëm që do të shëtisin njerëzit, por do të zhvillohet edhe ekonomia e vogël dhe zejet”, thënë Haziri.

Ai konfirmoi se ky projekt do të vazhdohet deri në përfundimin e shtratit të lumit Mirusha në një gjatësi prej 3 kilometrash.

“Do të vazhdojmë çarshinë ta zgjerojmë në drejtim të Deremahallës dhe në drejtim të lagjes Dardania, që përfshin ndërtimin e komplet shtratit të lumit në më shumë se 3 kilometra ecje. Tretmani i ujërave të zeza merr zgjidhje përfundimtare në fund të vitit të ardhshëm me ndërtimin e impiantit të ri, ku përfshihet trajtimi i ujërave të zeza prej Grykës së Karadakut, fshatrat e rrafshit të Gjilanit, fshatrat që lidhen me Novobërdën dhe të gjitha ujërat e zeza dhe të shiut që do përfundojnë në një fabrikë përpunimi. Morava do të përkthehet në lum të pastër për Uglarin, Malishevën dhe Pogragjën”, shtoi Haziri.

Haziri tha se Komuna e Gjilanit është në proces të realizimit të 37 projekteve infrastrukturore me buxhetin vetanak, në bashkëpunim me buxhetin e qeverisë dhe me donatorët e huaj.

Në fund, i pari i Gjilanit u ka kërkuar falje qytetarëve që ky projekt është realizuar me një vonesë 20-vjeçare që nga paslufta. /rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).