Në Bruksel mbështesin synimin e Kosovës për anëtarësim në Këshillin e Evropës, s’ka rrugë të shpejtë për BE
RajoniPress
17:15, 22 Prill, 2022
Draft-raporti i Komisionit për Punë të Jashtme i Parlamentit Evropian i cili pritet të miratohet më pas në këtë institucion të BE-së thotë se përkrahet fuqishëm qëllimi i Kosovës për të aplikuar për anëtarësim në Këshillin e Evropës. Kritikohet moslejimi i mbajtjes së zgjedhjeve të Serbisë në territorin e Kosovës dhe bëhet thirrje që të zbatohet Marrëveshja e Asociacionit të Komunave me Shumicë Serbe.
Gazeta Express
Sikur në çdo raport tjetër, i bëhet thirrje Këshillit të BE-së që t’i liberalizojë vizat për Kosovën pasi kriteret nga ana e Kosovës janë plotësuar që nga viti 2018 transmeton Gazeta Express.
Poashtu i bëhet thirrje Bashkimit Evropian që të fuqizojë përkrahjen dhe bashkëpunimin me Kosovën për t’i luftuar aktivitetet hibride malinje që vijnë nga Rusia dhe Kina.
Tutje draft-raporti thekson se përdorimi i gjuhës diskredituese ndaj gazetarëve është i papranueshëm.
“Nënvizon se mediet e lira janë njëra nga shtyllat thelbësore të demokracisë dhe se gazetarët duhet të jenë të mbrojtur nga presioni politik; thekson se përdorimi i gjuhës diskredituese kundër gazetarëve është i papranueshëm”, thuhet ndër të tjera në draft-raportin e PE-së.
Në raport përmendet edhe dështimi që Kuvendi i Kosovës ta miratojë draft Kodin Civil, i cili do të sillte progresin e shumë nevojshëm për qytetarët e Kosovës dhe do të kishte ndikim pozitiv në zhvillimin ekonomik të Kosovës
Qeverisë në anën tjetër i kërkohet ta zbatojë vendimin e Gjykatës Kushtetuese për parcelat e tokës në Manastirin e Deçanit dhe shprehet shqetësim që vendimi i Kushtetueses ka mbetur i pazbatuar e që përbën cenim të angazhimit të qeverisë për rend dhe ligj dhe respektimin e një gjyqësori të pavarur.
Përmendet edhe qëllimi i Kosovës që të aplikojë për statusin e vendit kandidat të BE-së gjatë këtij viti (2022), por që theksohet se për një proces të tillë s’do të ketë procedura të përshpejtuara dhe normalizimi i marrëdhënieve me Serbinë është i nevojshëm që Kosova të përparojë në rrugën e saj evropiane.
