Në “Bondsteel” vjen “Brigada vetëtimë”

Koloneli David Woods prej tash ka marrë drejtimin e komandës së Grupit Shumëkombësh të Betejës Lindje. Ceremonia e ndërrimit të kontigjentit ushtarak nga KFOR-i 16 në KFOR-in 17 është zhvilluar në Kampin ushtarak “Bondsteel”.

Komandanti i forcave të KFOR-it, gjenerali Volker Halbauer ka vlerësuar punën e paraardhësve të Woods derisa ka thënë se brigada 525 e njohur si “Brigada vetëtimë” është kombinim mes inteligjencës ushtarake, kalorësisë dhe një mori fushash për mbikëqyrje.

“Ju dhe ushtarët tuaj i takoni një njësie me një trashëgimi të madhe për zbarkime luftarake. Megjithëse disa nga zbarkimet e fundit i keni pasur në Afganistan dhe Irak, misioni këtu në KFOR është paksa më ndryshe dhe është një sfidë e veçantë për të kaluar në mision paqeruajtës. Misioni ynë këtu është që të ofrojmë një ambient të qetë dhe të ofrojmë liri të lëvizjes në Kosovë dhe ju keni përgatitur veten dhe ushtarët tuaj për këtë mision sfidues paqeruajtës”, ka thënë Halbauer.

Ndërkohë koloneli Woods ka premtuar angazhim për ruajtjen e paqes dhe sigurisë.

“Siguria vjen në radhë të parë nga njerëzit e Kosovës. Kjo është vizita ime e parë dhe unë pashë një shpirt të veçantë të njerëzve, dëshirë e të cilëve është të jetojnë në një mjedis të sigurt”, ka thënë koloneli Woods.

Në kampin “Bondsteell” pas dhjetë vitesh rikthehen njësitë e komponentës aktive të forcave të armatosura amerikane. Grupin shumëkombësh të betejës përveç ushtarëve amerikanë e përbëjnë edhe njësite ushtarake franceze, armene, marokene, polake, turke dhe gjermane. /Telegrafi/