Në 19-vjetorin e Betejes së Zhegocit, nis ndërtimi i autostradës Prishtinë – Gjilan – Konqul

Gjilan – Në 19 vjetorin e Betejes së Zhegocit, kreu i Gjilanit, Lutfi Haziri, kryeministri Ramush Haradinaj dhe kabineti qeveritar kanë bërë hapjen zyrtare të punimeve të autostradës Prishtinë-Gjilan-Konqul.

I pari i qeverisë, Ramush Haradinaj, tha se në këtë ditë ndihet krenar kur i kujtojmë të rënët për liri, duke shtuar se sot na është bashkuar edhe një ndjenjë tjetër.

“Sot atdheu ynë po bëhet më i bashkuar. Realizimi i këtij projekti është meritë e të gjitha qeverisjeve paraprake”, u shpreh Haradinaj.

Kryetari i Komunës së Gjilanit, Lutfi Haziri, theksoi se nuk ka pasur ditë më të mirë për fillimin e këtij projekti gjigant, sesa në shënimin e përvjetorit të madh të Betejes së lavdishme të Zhegocit, në të cilën u vranë 8 ushtarë të luftës çlirimtare dhe 18 civilë.

Ai ka falënderuar qeverinë Haradinaj dhe ish qeverinë e Isa Mustafës, përkatësisht ish- ministrin Zharku, për projektimin e kësaj autostrade, projekt ky që do të krijoj zhvillim të hovshëm ekonomik për gjilanasit dhe Anamoravën në përgjithësi.

“Nuk është rastësi që autostradën e kemi çu deri në Konqul sepse Kosova Lindore bashkë me Malësinë e Gollakut përbëjnë 30 për qind e popullatës së Republikës. Ky projekt jep mundësi që edhe në korridorin e kombit, Anamorava dhe kjo zonë të integrohet në më pak se gjysmë ore distancë kohore, por edhe Kosovës i jep mundësi për dalje në korridorin e 10 ndërkombëtar”, tha Haziri.

“Kjo është një mundësi e madhe për zhvillim ekonomik dhe qarkullim të shkurtër për qytetarët e Anamoravës dhe për bashkatdhetarët. Së shpejti do të fillojë edhe ndërtimi i rrugës prej Pllakës së Dëshmorëve për Verbicë të Zhegocit për t’u lidhur me Lipjanin. Ky projekt është po aq i rëndësishëm sa autostrada, e cila do t’ua lehtësoj jetën këtyre banorëve që janë kontribuues të mëdhenj të lirisë. Urime kjo ditë e madhe dhe lavdi të gjithë dëshmorëve”, ka thënë Haziri.

Ministrja e Mjedisit dhe Planifikimit Hapësinor, Albena Reshitaj, theksoi se është e lumtur që gjinden në Anamoravë në, siç tha, vendin e sakrificës, kulturës e artriti për të nisur një vepër shumë të veçantë dhe shumë të rëndësishme për të gjithë qytetarët e kësaj ane.

Nga ana e tij, ministri i Infrastrukturës, Pal Lekaj, u shpreh i lumtur për fillimin e këtij projekti, duke thënë se më këtë autostradë po bëhet lidhja e Prishtinës me Kosovën Lindore./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).