Ndryshimi i Kodit Penal, manovër e re e Thaçit

Krimi dhe korrupsioni luftohen vetëm me zbatimin efikas të ligjeve.

Salihaj: Presidenti i ri tenton t’u shesë mjegull qytetarëve të Kosovës

“Mosinteresimi i luftimit të sistemit kurruptiv tregohet më së miri me vetë faktin se, kur presidenti i tanishëm ishte kryeministër për dy mandate, e më pastaj edhe njeriu i dytë në Qeverinë ‘Mustafa’, nuk ka pasur kurrfarë iniciative konkrete të kësaj natyre. Kjo situatë ishte e tillë, pasi që i pari i shtetit do të ishte ai, që do të binte i pari në atë ‘front’ ”, shprehet analisti Ali Hertica

Pas deklarimit të parë pompoz nga presidenti Hashim Thaçi, se ai do të jetë personalisht iniciues i fillimit të hartimit të një modeli të ri legjislativ për dekriminalizimin e institucioneve të shtetit, tani ka dalë zotimi i tij i dytë, marrja përsipër e nismës për ndryshimin e Kodit Penal të Kosovës, për fuqizimin më të mirë të luftës kundër të gjitha dukurive negative, që e kanë mbërthyer shtetin tonë, për fuqizimin e sundimit të ligjit. Mirëpo, këto nisma, presidenti aktual nuk ishte kujtuar që t’i marrë sa ishte në pozitën e kryeministrit të vendit, madje as në pozitën e zëvendëskryeministrit për një vit e gjysmë në mandatin e tretë. Përfaqësues të partive politike, ekspertë të fushës dhe analistët politikë këtë lloj agjende legjislative të presidentit të vendit po e shohin hiç më shumë se një mosgatishmëri të politikës së inkriminuar, për luftimin e dukurive negative në shoqëri, krimit të organizuar dhe korrupsionit, vetëm duke u arsyetuar me ndryshim të plotësimit të herëpashershëm të ligjeve në fuqi, shumica e të cilave nuk zbatohen fare. Madje, insistimi i fundit i presidentit Thaçi, për të rishikuar edhe Kodin Penal të Kosovës, sikur që është vepruar me shumëfishimin e mekanizmave kundër korrupsionit, do të jetë vetëm një vazhdim i ruajtjes për shumë kohë të situatës së njëjtë të pamundësisë së luftimit të atyre dukurive .

“Ndryshimi dhe plotësimi i ligjeve, formimi i komisioneve apo task-forcave nuk është asgjë tjetër vetëm shitje e mjegullës qytetarëve të Kosovës, se gjoja po krijohen mekanizma të veçantë për luftimin e krimit dhe korrupsionit. Qytetarët e Kosovës e mbajnë mend formimin e task-forcës për hetimin e vjedhjes së Dhomës së dëshmive, pastaj të Këshillit Kundër Korrupsion, etj. Asgjë nuk është bërë deri më tash. Hetimi dhe zbulimi i krimit dhe korrupsionit është në nivelin zero. Edhe manovrimet e Thaçit si president kanë qëllim të njëjtë për t’u shitur mjegull qytetarëve të Kosovës dhe për të vazhduar zhvatjen e pamëshirshme e tyre. Kosova, edhe me këtë Kod Penal, por edhe me ligjet në fuqi, si dhe me organet e drejtësisë ka mekanizma të mjaftueshëm për luftimin e krimit dhe korrupsionit. Por, krimin dhe korrupsionin nuk do ta luftojnë asnjëherë të inkriminuarit “mafio italianë” dhe të korruptuarit, prandaj qytetarët e Kosovës nuk duhet të mashtrohen me këto manovër të re të Thaçit”, u shpreh deputeti i LDK-së, Adem Salihaj./kosova sot/