Ndryshimet ligjore për marrëveshjen, “Ahtisaari plus”

Ekspertët ligjorë nga Prishtina dhe Beogradi janë në proces të identifikimit të ligjeve që do të duhet ndryshuar si në Kosovë ashtu edhe në Serbi për zbatimin e marrëveshjes së 19 prillit. Fillimisht ishte folur për 7 e më pas edhe për 30 ligje që Kosova do të duhej t’i ndryshonte apo miratonte nga fillimi. Kurse në Serbi, kjo parashihet të rregullohet me miratimin e Ligjit kushtetues.

Njoftimet nga Beogradi flasin për nisma që kanë të bëjnë me ndryshime ligjore nga fusha e gjyqësisë, administrimit lokal, policisë dhe arsimit.

Burime nga Qeveria e Kosovës i kanë thënë gazetës se fillimisht do të shikohen të gjitha fleksibilitetet e mundshme brenda ligjeve ekzistuese në mënyrë që të ketë sa më pak implikime ligjore.

Por, sipas tyre, problemi më i madh do të jetë gjetja e bazës ligjore (në ligjin aktual) për emërimin e komandantëve lokalë të policisë në veri.

Kurse situatë aspak më e lehtë nuk do të jetë edhe gjetja e bazës ligjore për funksionimin e gjykatave atje, marrë parasysh kompetencat e shtuara që i janë veshur asociacionit të komunave serbe.(Tribuna)