Ndezja e hamulloreve shqetëson qytetarët gjilanas

Gjilan – Ndezja hamulloreve po shkakton telashe të mëdha për banorët të cilët gjenden afër vatrave të zjarreve. Vetëm të dielën zjarrfikësit kanë intervenuar në disa lokalitete derisa një zjarr më i madh është paraqitur në mes të lagjes së tetë në drejtim të Livoqit. Zjarrfikësit janë treguar shumë efikas derisa banorët apelojnë që ndezjet të bëhen të dënueshme për ata që kapen duke shkaktuar zjarre.

Një zjarr i një hamulloreje në mes të lagjes së tetë dhe Livoqit të Poshtëm ka shqetësuar tej mase banorët e kësaj zone pasiqë zjarri kishte kapluar disa hektar. Zjarri ishte ndezur për disa orë gjë që kishte shkaktuar tym nëpër shtëpitë e banuesve.

Pasi janë lajmëruar zjarrfikësit ata kanë dalur menjëherë në vendin e ngjarjes ku profesionalisht e kanë lokalizuar në tërësi zjarrin.

Edhe policia ishte e pranishme derisa banorët e këtyre zonave thanë se ata që kapen duke ndezur hamullore duhet të arrestohen dhe ndiqen penalisht.

Edhe policia disa herë ka apeluar që mos të ndizen hamulloret sepse ato shkaktojnë zjarre të pakontrolluara./rajonipress/