“Ndeshje jo edhe aq miqësore”, përballja e Shqipërisë ndaj Uellsit u përshkua me shumë tensione dhe kacafytje mes lojtarëve

Kombëtarja e Shqipërisë luajti në udhëtim te Uellsi në ndeshjen miqësore të zhvilluar në Kardif, e cila u përshkua në disa raste me shumë tensione mes futbollistëve.

Shqipëria barazoi pa gola 0-0 ndaj Uellsit në një ndeshje që nuk munguan rastet dhe loja ishte shumë e luftuar.

Megjithatë, në disa raste kjo ndeshje u karakterizua me nervozizëm të tepruar me lojtarët e të dyja ekipeve që i lëshonin nervat.

Gjatë ndeshjes pati disa raste ku futbollistët tentuan t’i qëronin hesapet mes vete, ndërsa ishte gjyqtari i cili nuk lejonte që situata të eskalonte.

Fillimisht në minutën e 36-të kishte një rast ku protagonist ishte Berat Gjimshiti dhe David Brooks, i cili mbeti i ndëshkuar.

Pastaj në minutën 58-të pati një ekses ku Rhys Norrington-Davies shtyu sulmuesin Rey Manaj, i cili në rrëzim e sipër mori me vete edhe trajnerin Edy Reja.

Kjo bëri që lojtarët shqiptar dhe trajneri të reagojnë, duke krijuar paksa tollovi, e cila u qetësua shpejt.

Momenti më tensionues i ndeshjes ishte në minutën e 83-të, ku pati disa ndërhyrje të njëpasnjëshme nga të dyja palët, ndërsa edhe kacafytjet nuk munguan, ku në fund u ndëshkuan tre lojtar me kartonë të verdhë.

Në gjithë ndeshjen pati gjithsej shtatë kartonë të verdhë, katër nga Shqipëria dhe tre nga Uellsi, duke bërë mediat që ta cilësojnë këtë si ndeshje “jo edhe aq miqësore”. /Telegrafi/