Ndërron jetë hendbollisti i shquar Valon Shala

Ka ndërruar jetë në moshën 39 vjeçare, pas një sëmundje të shkurt, njëri ndër hendbollistët më të mirë që ka pasur hendbolli Kosovar, Valon Shala.

Ish-hendbollisti Shala i cili ishte i pa zëvendësueshëm në rolin e tij të Pivotit, ishte anëtari Kombëtares së Kosovës për 10 vite. Shala ka pasur një karrierë të bujshme të hendbollit duke luajtur për klube të mëdha të Kosovës por edhe jashtë saj.

Ish-hendbollisti Shala karrierën e ka zhvilluar në Besë të Pejës, Vëllaznim të Gjakovës, në Kosovë të Vushtrrisë, gjithashtu Shala karrierën e tij e kishte zhvilluar edhe në Gjermani. Me shumë nostalgji njëri ndër hendbollistët më të mirë të Dritës dhe anëtar i shumë klubeve të Kosovës dhe hendbollist i Kombëtares së Kosovës, Dukagjin Azizi, përkujton shokun e tij, Valon Shala.

“Është një ditë shumë e trishtuar të na len përgjithmonë shoku e bashkëlojtari im Valon Shala. Jam shumë i nderuar që kam pasur rastin të ndajë karrierën e hendbollit me të, ai ishte një hendbollist e njeri shembullor. Prehu në paqe shoku im i cili do të na mungosh në këtë jetë”.