Ndërroi jetë Teuta S. Hoxha, arsimtare e dalluar e matematikës

Gjilan – Teuta S. Hoxha, arsimtare e lëndës së matematikës, nga sot na mungon. Na mungon dhe mungesa e saj është e rëndë, tejet e rëndë. Ajo së pari i mungon familjes së saj, Hoxha, mandej u mungon shkollarëve ku ajo punoi, por u mungon edhe kolegëve të Shkollës fillore “Agim Ramadani” në Zhegër.

Por, ja vdekja. Ajo po i merr njerëzit para kohe dhe në mënyrë tinzare. Tinëz e mori edhe pishtaren e arsimit, Teuta S. Hoxha, e cila, gjer sa u shkollua, gjithnjë e pati ëndërr punën me ditar në dorë. Pse jo? E deshi jetën me ditar. I donte fëmijët shkollarë. Shih për këtë, asaj i kishte rënë në duar romani “Afërdita” e autorit Sterjo Sasse. Dihet, nga aty ajo ishte frymëzuar t’i dojë fëmijët, shkollarët, të cilët, sa herë dilte para tyre, e ndjente vetën një Afërditë të dytë. Vinte si Afërdita në Grykas për t’i mësuar fëmijët, ndërsa Teuta vinte në shkollën e Zhegrës, aty ku punoi 20 vite me radhë.

Punoi dhe nuk ndjeu asnjëherë lodhje. Edhe Rrahman Agushi, drejtor i Shkollës fillore “Agim Ramadani” na tha se, ajo qe një punëtore e madhe e arsimit. “Po, e tillë ishte dhe kurrë nuk ndjeu lodhje në punën e saj shembull. Nuk ndjeu lodhje, ndonëse çdo ditë udhëtoi nga Gjilanit gjer në Zhegër, aty ku e kishte cakun e punës. Ishte e rregullt dhe shumë punëtore. E deshi shumë lëndën e matematikës. Nuk përtonte të barte me vete “sendet” e gjeometrisë, matematikës, ku dora e saj ishte përplot me mjetet e konktretizimit të orës mësimore. Fliste pak, por punonte shumë. Kërkonte nga shkollarët ta mësojnë mirë lëndën e saj. E dëgjoja se kur fliste për matematikën, hudhej nëpër ato kënde, numra e forma të tjera, ku shkollarët e adhuronin punën e saj. Pati të kryer e Fakultetin e Matematikës. Por, ja, ajo na iku para kohe. Nuk bëri asnjë mungesë gjer sa ishte mirë me shëndet. Ka qenë shembull për të tjerët”, na tha Rr. Agushi – drejtori i shkollës në fjalë.

Gjatë kohës së punës, ajo u shpërblye me disa mirënjohje e fletëlavdërata. Në kohën “Shtëpi- shkoll”, kjo arsimtare punoi edhe në paralelet e ndara të Gjimnazit të këtij lokaliteti. Ishte e tëra punëtore me ditar në dorë. Ajo vdiq nga një sëmundje e pashëruar. Por, vepra e saj mbeti “gjallë” tek shumë breza që i edukoi dhe i arsimoi. Teuta vdiq në moshën 45-vjeçare. Një vdekje e dhimbshme dhe para kohe. Para kohe, sepse ajo ishte në vlugun e punës për dije e jetë.

Sot me dhembje dhe pikëllim është bërë vorri i Teuta S. Hoxha, arsimtare e lëndës së Matematikës në Gjilan, e cila për 20 vite me radhë punoi pa u ndalur në Shkollën fillore “Agim Ramadani” në Zhegër. Na iku para kohe një pishtare e dalluar e arsimit. Na iku, por vepra e saj ka mbetur e “gjallë”tek shkollarët, të cilët, arsimtaren Teutë kurrë nuk do ta harrojnë. Është kjo një vdekje e dhimbshme dhe para kohe. I qoftë lehtë dheu!/tefik selimi/rajonipress/