Ndërpritet paraburgimi ndaj Leutrim Zejnullahut‏

Të mërkurën me 11.11.2015, një kolegj penal prej tre gjyqtarësh i Departamentit të Krimeve të Rënda të Gjykatës së Apelit, ia ka ndërprerë masën e paraburgimit të pandehurit Leutrim Zejnullahu. Kështu, Apeli e pranoi si të bazuar, ankesën e mbrojtësit të të dyshuarit në fjalë, kundër aktvendimit të Gjykatës Themelore në Gjilan, të datës 04.11.2015. Leutrim Zejnullahu po dyshohet nga ana e prokurorisë, se ka kryer veprën penale: “Vrasje nga pakujdesia” dhe veprën penale: “Mbajtje nën pronësi, kontroll ose posedim të pa autorizuar të armeve”.

Sipas vlerësimit të Gjykatës së Apelit, nga shkresat e lëndës rezulton se ndaj të pandehurit ekziston dyshimi i bazuar, se ka kryer veprën penale në fjalë. Mirëpo konstatimi i gjykatës së shkallës se parë, se po te lihej në liri, ai mund të ndikoj në dëshmitarë nuk qëndron.

Kjo ngase dëshmitarët tashmë kanë dhënë deklaratat e tyre në polici, andaj nuk ekziston rreziku i ndikimit, aq me tepër kur te njëjtit janë familjarë të tij, dhe konform dispozitave ligjore, janë te liruar nga dhënia e dëshmisë. Po ashtu kjo gjykatë, vlerëson se është i pa qëndrueshëm edhe konstatimi tjetër i Gjykatës Themelore, se me gjetjen e të pandehurit në liri, vihet në pikëpyetje siguria e tij, ngase gjendja e tij emocionale është e renduar, meqë viktimën e ka pasur motër . Është pikërisht ky fakt që argumenton se gjendja emocionale e të dyshuarit do të jetë më e lehtë, në rrethana familjare, se sa në paraburgim, pasi që aty do të gjejë mbështetje morale, dhe do ketë përkujdesje që situatën ta kaloj më lehtë./rajonipress/