Ndërkombëtarët këmbëngulin në themelimin e Speciales

Autoritetet kosovare kanë pranuar të martën kërkesën e drejtpërdrejtë të faktorit ndërkombëtar që Prishtina zyrtare të mos ndalet në rrugën për ta themeluar Gjykatën Speciale, pavarësisht se javën e shkuar Kuvendi refuzoi ta bënte këtë. Kërkesa i është shtruar kryeministrit Isa Mustafa në Berlin, por edhe presidentes Atifete Jahjaga në Prishtinë.

Pas dështimit të javës së shkuar që amendamenti kushtetues për Specialen të marrë mbështetjen e deputetëve, drejtuesit e Qeverisë dhe ata të Kuvendit janë duke studiuar mënyrën se si ta çojnë çështjen përpara, shkruan sot “Koha Ditore”.

Kanë në tavolinë edhe skenarin për themelimin e Speciales vetëm duke u thirrur në letërkëmbimin Jahjaga-Ashton, por prioritet i kanë dhënë riprocedimit në Kuvend të amendamentit kushtetues.

Shkaku që opozita po e vlerëson këtë si shkelje në procedurë, ekspertët janë duke analizuar nëse për këtë është i nevojshëm një opinion paraprak i Gjykatës Kushtetuese, apo që procesin ta udhëheqë kryeparlamentari Kadri Veseli, si autoritet përfundimtar për ta interpretuar Rregulloren e Kuvendit..

http://koha.net/?id=27&l=64479