Nderim për Llukman Halilin!

Shoqëria Civile, Shoqata e gazetarëve “Etika” së bashku me mediat Jetapress, Jehona, Perspektiva, Tërnocipress etj, shprehin ngushëllimet e thella për ndarjen nga jeta të gazetarit, publicistit dhe politologut të njohur nga Tërnoci Lukman Halilit.

Llukman Halili, ndjesë pastë shpirti i tij, në botën e amshuar ishte mik dhe dashamirë edhe të mediumeve të pakta që dalin në Luginë të Preshevës, duke qenë gjithmonë një zë i fuqishëm për zhvillimin dhe promovimin e vlerave, informative dhe kulturore në Luginë të Preshevës dhe më gjerë në shqiptari.

Llukman Halili lindi, në vitin 1958, në fshatin Tërnoc të Madh. Shkollën fillore e mbaroi në vendlindje, ndërsa të mesmen në Bujanoc. Fakultetin Shkencave Politike e kreu në Zagreb, ku gjithashtu përfundoi Studimet postdiplomike nga lëmi i marrëdhënieve ndërkombëtare dhe mori titullin Magjistër i Shkencave Politike – Marrëdhënie Ndërkombëtare.

Në vitin 1983-1985 specializoi për marrëdhënie ndërkombëtare në Institutin e Shkencave Politike në Varshavë nën përkujdesjen e prof. dr. Jozef Kukulka.

Në Universitetin e Zarës në lëmin e Shkencave Humane mbrojti doktoratën me temë “Lëvizja studentore dhe Shqipëria 1990-1992”.

Nga viti 1985 – 1990 ka punuar komentator në Televizionin e Prishtinës – Redaksia e politikës së jashtme, kurse në vitin 1990-1992, punoi korrespondent për Ballkanin i Agjencisë Kroate të Lajmeve – HINA.

Në vitin 1994, ka emigruar në Zvicër.

Llukman Halili, vite të tëra ka qenë redaktor e kryeredaktor i shtypit shqiptar në Zvicër, veçmas në gazetat “Bota sot”, “Zëri ditor” etj.

Llukman Halili, është i prezantuar edhe në “Leksikonin e Autorëve Shqiptarë në Zvicër” në vitin 2016, si autor i veprave të botuara: „Unë Ramiz Alia dëshmojë për historinë“, botuar në Prishtinë 1992, “Politika e jashtme e Polonisë 1945-1980” , si bashkautorë në kroatisht në Zagreb, në vitin 2012, “30 vjet në shërbim të kombit“, monografi,si bashkautor, të botuar në Zvicër në Zvicër në vitin 2014.

“Levizja studentore shqiptare, 1990-1991”, Tiranë 2016 dhe librin dhe“Rrëfimi politik për Dr. IBRAHIM RUGOVA”, në kroatisht, në Zagreb në vitin 2017

Për veprimtarinë jetësore të Llukman Halilit, u ndanë shumë mirënjohje nga institucione të larta, duke llogaritur edhe të Komunës së Bujanocit, e cila e nderoi këtë veprimtar me rastin e manifestimit të ditës së komunës nga kryetari Shaip Kamberi.

Duke shprehur ngushëllimet e tona familjes, miqve dhe dashamirëve të shumtë, ndajmë dhimbjen me ta, duke u lutur që shpirti i Llukman Halilit, të prehet në paqe në botën e amshuar!

Shpërndaje.
© RAJONIPRESS