Ndërhyrja e QUINT’it, Vjosa Osmani tregon se në çfarë formati mbahet nesër takimi

Në takimin e nesërm mes Lëvizjes Vetëvendosje dhe Lidhjes Demokratike të Kosovës do të marrin pjesë edhe përfaqësuesit e QUINTI’it dhe të Bashkimit Evropian. Nënkryetarja e LDK’së, Vjosa Osmani, ka treguar për Gazetën Express se në çfarë formati do të mbahet nesër takimi.

Negociatat vazhdojnë edhe nesër, në praninë e përfaqësuesve e QUINT’it dhe BE’së, e Osmani tregon se ky takim do të jetë ‘informativ’.

Siç tregon nënkryetarja e LDK’së, në takimin e nesërm nuk pritet të ndërmjetësojnë vendet e QUINT’it për arritjen e marrëveshjes.

“Takim informativ, ashtu ka qenë ideja kur e diskutuam”, ka thënë Osmani për Express.

Osmani ka treguar se ka qenë kërkesë e përbashkët e LDK’së dhe e Lëvizjes Vetëvendosje për të zhvilluar takim në praninë e ambasadorëve të QUINT’it.

LDK njoftoi se në takimin me Lëvizjen Vetëvendosje, që është mbajtur sot në Kuvendin e Kosovës, ka shpalosur qëndrimet e veta të ditura publikisht.

“Në takimin e sotëm kemi shpalosur qëndrimet tona, tashmë të njohura dhe publike për opinionin. Konsiderojmë që këto qëndrime janë të balancuara për të dy palët dhe që i shërbejnë stabilitetit të qeverisjes së vendit”, thuhet në njoftimin e LDK’së, transmeton Gazeta Express.

LVV’ja njoftoi para LDK’së se në takimin që zgjati më shumë se dy orë nuk është arritur marrëveshje për formimin e Qeverisë.

“Sot pasdite, në Kuvendin e Kosovës u mbajt edhe një takim ndërmjet LVV dhe LDK. Nuk u arrit marrëveshja”, thuhet në njoftimin e LVV’së, transmeton Gazeta Express.

“Palët u pajtuan që nesër të zhvillohet një takim tjetër bashkë edhe me ambasadorët e Quint-it në Prishtinë si dhe me Shefen e Misionit të BE-së”, thuhej në njoftim.

LVV kujton se kanë mbetur edhe tetë ditë deri më 4 shkurt, kur skadon afati për formimin e Qeverisë.

“Kanë mbetur edhe tetë ditë deri në skadimin e afatit kushtetues për koalicionin qeverisës”.

Në takimin e sotëm mes LVV’së, që doli e para në zgjedhjet e 6 tetorit dhe LDK’së, që doli e dyta, morën pjesë përveç liderëve edhe eksponentët e lartë të tyre.

Derisa LVV’ja këmbëngul se nuk do ta heqë Glauk Konjufcën nga pozita e kryeparlamentarit në të cilën është zgjedhur më 26 dhjetor, LDK’ja thotë se i takon asaj ky post dhe se nuk bën marrëveshje pa u liruar karrigia e Kreut të Kuvendit. /Express

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).