Ndahet nga jeta Zymer Starabanja, truproja e shkollës shqipe në kohën e okupimit

Gjilan – Zymer Starabanja është ndarë nga jeta në moshën 54 vjeçare. Gjeneratat e vjetra dhe ata që kanë jetuar, punuar e vepruar në kohën e okupimit nga Serbia, e kanë njohur mirë rolin dhe kontributin e këtij gardiani të shkollës shqipe. Ka mbrojtur shkollën nga hajnat, vajzat nga kriminelët duke u shëndërruar kështu në ikonë të mbrojtjes së vlerave të shkollës shqipe.

Zymer Azem Starabanja ishte vetëm 54 vjeçar kur ndërroi jetë këtë fundjavë, derisa është varrosur të hënën.

Zymer Starabanja njihet mirë nga gjeneratat e vjetra dhe ata që e kanë përjetuar dhunën dhe dajakun e Serbisë në kohën e okupimit. Zymeri bashkëjetonte me këtë dhunë e presion që bënte Serbia vazhdimisht.

Ndonëse roli i tij ishte vetëm si roje e shkollës, Zymeri u gjend kudo. Mbroji shkollën nga hajnat e shumtë, mbrojti vajzat shqiptare nga huliganët e asaj kohe dhe mbrojti edhe kolektivin e shkollës kur ishte nevoja.

Për Zymer Starabanjën nuk u ndanë as mirënjohje, nuk u dha asnjë telegram ngushëllimi nga Drejtoria e Arsimit, por pavarësisht kësaj Zymeri do të jetojë gjatë në kokat e profesorëve të përkushtuar, që e kanë ditur saktë kontributin e madh e të pamohueshëm që ka dhënë ai në mbrojtje të shkollës shqipe./rajonipress/