Ndahet nga jeta Prof. Dr. Nuhi Rexhepi, një prej emrave më të shquar të albanologjisë dhe arsimit universitar në Kosovë

Gjilan – Bota akademike shqiptare ka pësuar një humbje të rëndë me ndarjen nga jeta të Prof. Dr. Nuhi Rexhepit, profesor universitar, gjuhëtar dhe studiues i shquar i letërsisë shqipe, i cili për dekada dha një kontribut të çmuar në arsimin e lartë dhe në zhvillimin e studimeve albanologjike në Kosovë.

Lajmin për vdekjen e profesorit e bëri të ditur nipi i tij, Fatmir Rexhepi, i cili njoftoi se ceremonia e varrimit do të zhvillohet më 9 korrik 2026, në ora 16:45, në Varrezat e Qytetit të Prishtinës, në Arbëri.

I lindur në vitin 1942 në Pogragjë të Gjilanit, Prof. Dr. Nuhi Rexhepi i takon brezit të studiuesve që ndërtuan themelet e arsimit universitar dhe të kërkimit shkencor në Kosovë. Pas përfundimit të shkollimit fillor dhe të Normales në Prishtinë e Gjakovë, ai diplomoi në Degën e Gjuhës dhe Letërsisë Shqipe në Fakultetin Filozofik të Universitetit të Prishtinës në vitin 1967. Studimet pasuniversitare i kreu në Beograd, ndërsa në vitin 1995 mbrojti doktoratën në Universitetin e Prishtinës me një temë kushtuar interpretimit të letërsisë shqipe.

Karrierën e nisi si mësues dhe profesor në vendlindje, në Obiliq dhe Gjilan, ndërsa nga viti 1972 u bë pjesë e Universitetit të Prishtinës, ku ligjëroi Historinë e Letërsisë Shqipe dhe Metodikën e Mësimdhënies. Për breza të tërë studentësh ai mbeti një pedagog i përkushtuar, i njohur për profesionalizmin, përkushtimin ndaj dijes dhe qasjen akademike.

Përveç veprimtarisë mësimore, Prof. Dr. Rexhepi dha një kontribut të rëndësishëm në fushën e kërkimit shkencor, duke qenë autor, redaktor dhe recensues i shumë veprave me karakter shkencor, gjuhësor e letrar. Veprimtaria e tij u shqua për përkushtimin ndaj studimit të letërsisë shqipe dhe avancimit të mendimit albanologjik.

Me ndarjen e tij nga jeta, Kosova humb një personalitet të spikatur të arsimit dhe shkencës, ndërsa brezat e studentëve, kolegët dhe komuniteti akademik do ta kujtojnë si një profesor që ia kushtoi jetën dijes, edukimit dhe afirmimit të vlerave të gjuhës e letërsisë shqipe.

Qoftë i përjetshëm kujtimi për Prof. Dr. Nuhi Rexhepin./rajonipress/