Ndahet nga jeta njëri nga pinjollët e familjes Kajolli, veterani i Ballit Kombëtar – Qahil Kajolli

Nga Sadik Haxhiu – Të premten me nderime të larta në varrezat e Butelit në Shkup në praninë e qindra qytetarëve nga të gjitha trojet shqiptare u varros njëri nga pinjollet e familjes kreshnike Kajolli – Qahil Kajolli. Po së pari kush ishte familja e Qahil Kajollit ?

Qahil Kajolli ishte:
Sternip i Shabi Kajollit të Parë i shpallur Nder i Kombit nga Presidenti i Shqipërisë me 2015.
Nip i Jusuf Kajollit të Parë i cili bie në fushë të mejdanit kundër bishave sllave me 1818.
Djal i Hajriz Kajollit i cili ka udhëhequr çetat balliste gjatë Luftës së Dytë Botërore dhe i burgosur shumëvjeçar në burgjet komuniste Jugosllave.
Vëlla i Shabi Kajollit të dytë i cili bie dëshmorë në vitin 1945 kundër bishave sllave
Vëlla i Jusuf Kajollit të Dytë student i drejtësisë në Lubljan i cili vdiq nga torturat e UDB-së Rankoviqiane në vitin 1951.

Axha i Shabi Kajollit të tretë i cili ra dëshmor në Koshare me 5 maj 1999
Ky është oxhaku ku lindi dhe u kalit Qahil Kajolli. Qahili lindi në vitin 1925 në familjen atdhetare Kajolli në fshatin Skifteraj të komunës së Vitisë, buzë maleve të thepisura të Karadakut kreshnik. U shkollua në Medresen e Shkupit për të marrë dije të jashtëzakonshme për kohën. Për aftësitë që tregoi në nxenien e dijës në Kur’an u quajt Hafez. Familja e tij nga zullumi sllav u detyruan të shpërngulen për Shkup para Luftës së Dytë Botërore.

Lufta e dytë botërore për trojet shqiptare ishte një zezonë e vërtetë. Qahili bashkë me burrat tjerë të kësaj familje Hajrizin, Shabiun e Dytë, Jahën, Sadikun, Nexhipin, Xheladinin, Jetishin kapin pushkët për mbrojtjen e trojeve shqiptare.

Shquhen në shumë bëteja si në luftën e Kikës, Gurit të Zi dhe veçanërisht në betejën në Raincë të Preshevës me 20 tetor 1944 kundër çetnikëve ( të ashtuquajturave Brigada komuniste serbo – maqedone).

Gjatë luftës kundër pushtuesve sllav në vitin 1945 bie dëshmor Shabi Kajolli i dytë.

Pas përfundimit të Luftës së Dytë Botërore, Qahili me babain e tij Hajrizin kishin mbetur nëpër male. Ai kishte marrë detyrë nga bashkëluftëtarët e tij që kishin mbetur në male për të rënë në kontakt me kreun e NDSH –së në Shkup për të vazhduar rezistencën. Me 14 gusht nga malet e Karadakut hyn në Shkup për të rënë në kontakt me krerët e NDSH-së, por shpejt zbulohet, rrethohet nga OZNA dhe burgoset dhe dënohet me shumë vite burg duke u torturuar barbarisht nga UDB-ja famëkeqe. Pak më vonë burgoset edhe babai i tij Hajrizi.

Por familja e tij nuk kishte mbetur pa zot shtëpie. Jashtë burgjeve ishte Jusufi i dytë (vëllai i Qahilit) i cili ishte student i drejtësisë në Lublanë. UDB-ja famëkeqe i kishte rënë në gjurmë këtij intelektuali të ri dhe në vitin 1951 e arrestojnë dhe pasi që pushteti nuk mundi ta bëjë për veti e torturojnë aq shumë, saqë nga torturat vdes në një spital të Shkupit.
Pas disa viteve qëndrimi në burg lirohen: Qahili dhe babai i tij Harjizi. Ata do të arrestohen edhe disa herë deri në rënien e Rankoviqit nga pushteti. Por as klika komuniste ‘’liberale’’ e Titos nuk i linte rehat. Sa herë që Tito vizitonte Shkupin, pushteti izolonte Qahilin dhe babain e tij.

Nën këtë frymë atdhetarie lindi dhe u rritë Shabi Kajolli i Tretë, djali i vëllait të Qahilit i cili si ushtar i Ushtrisë Çlirimtare të Kosovës, ra dëshmor me 5 maj 1999 në Koshare të Dukagjinit.

Bacë Qahili në vitet e fundit edhe pse në moshë të shtyer është vizituar shpesh nga: veprimtarë, historian, publicist, politikan etj. Ai para tyre gjithmonë ka dhënë porosinë se: ‘’Lufta për bashkim kombëtar duhet vazhduar deri në fitore, sepse koj është e drejt e jona legjitime’’.
I përjetshëm qoftë kujtimi për atdhetarin – Qahil Kajollin./rajonipress/