Natali Velijajt i refuzohet statusi i dëshmitares së mbrojtur
Prishtinë – Natali Velija nuk do të jetë dëshmitare e mbrojtur për skandalin e pasaportave. Ajo është marr sot në pyetje nga prokurorë të EULEX-it dhe ka kërkuar që t’i jepet statusi i dëshmitares së mbrojtur por kjo i është refuzuar, transmeton KTV.
Pasi që ajo nuk e mori këtë status, vendosi që të mos flas asgjë për të involvuarit e mundshëm në këtë skandal derisa ka shfajësuar ministrin e Brendshëm Bajram Rexhepi për të cilin tha nuk ka qenë në dijeni. Natali Velija kishte premtuar se do t’i depononte të gjitha faktet për këtë çështje si dëshmitare e mbrojtur, e cila pretendon se ka dokumente që faktojnë se në këtë skandal janë të përfshirë zyrtarë të lartë të Ministrisë së Brendshme.
Sipas saj tenderi për pasaportat është marrë me dhënien e ryshfetit nga kompania austriake. Velija pretendon se 1.4 milion euro i ka shpërndarë në bazë të kërkesës së marrë nga kompania austriake OeSD.