Narkotikë e telefona nëpër qendrat korrektuese

Futja e Narkotikëve, telefonave dhe e gjërave të tjera “të ndaluara” nëpër qendrat korrektuese të Kosovës, vlerësohet si një “dukuri” e vazhdueshme.
Përveç familjarëve të të burgosurve, një rol kyç në qarkullimin e këtyre gjësendeve “e ka edhe stafi” i këtyre qendrave.

Këtë e pohojnë përfaqësuesit e organizatave joqeveritare që monitorojnë këto qendra, të cilët deklarojnë se ekziston një “rrjet zinxhirë” brenda këtyre qendrave që përbëhet nga pjesëtarët e tyre të cilët bëjnë futjen dhe shpërndarjen e mjeteve të ndaluara nëpër qendrat korrektuese.

Shërbimi korrektues i Dubravës, vlerësohet si njëra nga qendrat ku kjo dukuri është më e theksuar. Edhe përfaqësuesit e Shërbimit korrektues të Kosovës si dhe Policisë së Kosovës (PK) nuk mohojnë se ka raste të raportuara ku zihen familjarët duke tentuar të fusin mjete të ndaluara të të afërmit e tyre të burgosur apo të paraburgosur, mirëpo mohojnë se ekziston një grup i organizuar brenda qendrave korrektuese që e ushtron këtë aktivitet.

Resmi Hoxha, drejtor i Shërbimit Korrektues të Kosovës, nuk e ka përjashtuar mundësinë që të ketë ndonjë gardian të involvuar, i cili mundëson shpërndarjen e mjeteve të ndaluara, mirëpo ka përjashtuar çdo mundësi të ekzistimit të ndonjë rrjeti brenda qendrave korrektuese.

“Në mënyrë ligjore janë të ndaluara futja e lëndëve narkotike, telefonave dhe mjeteve të tjera. Në këto vitet e fundit nuk kemi pasur asnjë rast kur janë zënë pjesëtarët e stafit, që kanë qenë të implikuar në këso raste”, ka thënë Hoxha./Indeksonline/