Myrto Uzuni vazhdon shkëlqimin në Spanjë, shënon në barazimin e Granadas

Myrto Uzuni po vazhdon me formën e lartë në La Liga 2.

Në ndeshjen e vlefshme për javën e 31-të, Granada luajti baras në shtëpi me Ponferradinan, shkruan Gazeta Express.

Ndeshja u mbyll me rezultatin 2:2. Emri i Uzunit nuk kishte se si të mungonte në listën e golashënuesve.

Sulmuesi shqiptar shënoi në minutën e 70-të nga penalltia. Për 27-vjeçarin ishte ky goli i tij i 19-të në kategorinë e dytë të futbollit spanjoll.

Reprezentuesi i Shqipërisë prin si golashënuesi më i mirë në La Liga 2. Ai ka edhe tre asistime.

Alberto Perea (90+6’) e shënoi golin tjetër për vendasit. Për mysafirët realizuan Alexandru Pascanu (78’) dhe Yuri (81’).

Granada pas këtij barazimi ka 55 pikë dhe renditet e katërta në tabelë, me pikë të njëjta me Levanten e pozitës së tretë. Eibar prin me 59 pikë, kurse në pozitën e dytë është Las Palmas me 58 pikë.

Në fund, dy skuadrat e para në renditje e sigurojnë direkt promovimin në La Liga, kurse skuadrat nga pozita tre deri në gjashtë luajnë në “Play-Off”. Fituesit e këzaj faze inkuadrohen gjithashtu në elitën e futbollit spanjoll.

Ndërkaq, Ponferradina ndodhet në pozitën e 19-të me 30 pikë. /Gazeta Express/