Myrto Uzuni në formë jetësore, kontribuon me gol dhe asistim në fitoren e Granadas

Myrto Uzuni po vazhdon me formën e lartë në La Liga 2, teksa sot udhëhoqi Granadan drejt fitores në udhëtim kundër Albacetes, në kuadër të javës së 32-të.

Ndeshja e zhvilluar në stadiumin “Carlos Belmonte” përfundoi me rezultatin 1:2, shkruan Gazeta Express.

Emri i Uzunit nuk kishte se si të mungonte në listën e golashënuesve. Sulmuesi shqiptar shënoi në minutën e 30-të për epërsinë fillestare të skuadrës së tij.

Për 27-vjeçarin ishte ky goli i tij i 20-të në kategorinë e dytë të futbollit spanjoll. Reprezentuesi i Shqipërisë vazhdon t’i prijë listës si golashënuesi më i mirë në La Liga 2.

Pas golit, Uzuni asistoi te goli i dytë dhe i fitores për Granadan, që u shënua nga Ricard Sanchez, në minutën e 54-të. Ishte ky asistimi i katërt për futbollistin nga Berati.

Golin e vetëm për vendasit e shënoi Higinio Marin, në minutën e 64-të.

Granada pas kësaj fitore ka 58 pikë dhe renditet e dyta në tabelë.

Në fund, dy skuadrat e para në renditje e sigurojnë direkt promovimin në La Liga, kurse skuadrat nga pozita tre deri në gjashtë luajnë në “Play-Off”. Fituesi i këzaj faze inkuadrohet gjithashtu në elitën e futbollit spanjoll.

Ndërkaq, Albaceste ndodhet në pozitën e gjashtë me 51 pikë. /Gazeta Express/