Myftiu Saqipi, mori pjesë në Akademinë solemne kushtuar Vitit të Ri Islam “Hixhri 1441” në Maqedoninë e Veriut

Në mbrëmjen e të enjtes së 19 shtatorit, në Shkup, me anë të një akademie solemne në objektin e Filarmonisë, Bashkësia Fetare Islame (BFI) e Republikës së Maqedonisë së Veriut, ka shënuar ndërrimin e vitit kalendarik Islam “Hixhri 1441”, që lidhet me shpërnguljen e profetit Muhammedi (a.s) nga qyteti i Mekës drejt Medinës.

Në mesin e përfaqësuesve të shumtë nga jeta fetare në Maqedoninë e Veriut dhe rajoni, si dhe personalitetet nga jeta politike dhe shoqërore në vend, në këtë Akademi solemne ishte i pranishëm edhe Myftiu nga Lugina e Preshevës Nexhmedin ef. Saqipi, njëherit zëvendës Reis i Rijasetit të Bashkësisë Islame në Serbi.

Kreu i BFI-së, Sulejman Rexhepi, duke folur para të pranishmëve për Vitin e Ri Islam iu referua myslimanëve të botës për unitet mes tyre.

“Uniteti është ajo që sot më së shumti u duhet myslimanëve në botë, sepse uniteti ruhet dhe zhvillohet duke ushqyer respekt dhe dashuri të ndërsjellë”, tha midis tjerash Myftiu Rexhepi duke shtuar se “vetëm përmes ruajtjes, kultivimit dhe zhvillimit të atyre vlerave islame që u ngritën në rrethinën e ndritshme”

Në fund të programit kushtuar Vitit të Ri Islam, BFI ndau mirënjohje dhe çmime personaliteteve të çmuara në fusha të ndryshme.

Vlen të ceket se “Hixhret” nga fjala arabe nënkupton shpërnguljen e Profetit Muhamed (a.s) dhe pasueseve të tij nga Meka në Medinë, në vitin 622 të kalendarit gregorian. Myslimanët e rajonit në mënyra të ndryshme e shënojnë ndërrimin e viteve sipas Hixhrit.

Nëpër xhamitë lexohet Kurani dhe përgatiten programe të veçanta dhe ligjërata në lidhje me ngjarjen e Hixhrit.

Shpërngulja e Profetit Muhammed (a.s) dhe myslimanëve të parë nga Meka në Medinë, Hixhreti, është pikënisja e llogaritjes së kalendarit mysliman, ndërsa kjo ngjarje historike nënkupton fillimin e epokës së tyre.

Viti sipas Hixhrit zgjat rreth 354 ditë, përbëhet prej 12 muajsh dhe për njëmbëdhjetë ditë është më i shkurtër se kalendari diellor, njofton Jetapress.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).