Myfti me “zgjedhje të kurdisura e diktatoriale”

Mënyra e zgjedhjes së Naim Tërnavës për kryetar të Bashkësisë Islame të Kosovës ka ngjallur reagimin e Këshillit për Mbrojtjen e të Drejtave dhe Lirive të Njeriut. Sipas këtij këshilli, rizgjedhja e Tërnavës për Myfti të Kosovës, është bërë me vota të kurdisura.

KMDLNJ ka vlerësuar se BIK-u është shndërrua në një parti politike moniste ku skajshmërisht është ngushtuar hapësira e veprimit për individë që kërkonin reforma brenda këtij institucioni të mbyllur hermetikisht.

“Të gjithë ata që kundërshtuan imponimin e njëmendësisë si mjet krejtësisht jodemokratik për mbajtje me çdo kusht të pushtetit u përjashtuan apo u margjinalizuan. Nëpër derë të vogël, gjysmë ilegalisht u imponua ndryshimi i Kushtetutës së BIK-ut me të vetmin qëllim që të krijohen mundësitë edhe për një mandat të tretë për myftiun aktual, z. Naim Tërrnava i cili sikur “hezitonte” të hynte në garë për t’i qetësuar gjakrat e ndezura apo për t’i ulur tensionet që ishin në shkallën e shpërthimit”, është thënë në reagimin e KMDLNJ-së…(Tribuna).