Mustafi: Festoj me shqiponjë, sepse jam shqiptar

Mbrojtësi shqiptar i Valencias, Shkodran Mustafi, ka thënë se është shumë i lumtur me dygolëshin e shënuar në fitoren kundër Villarealit. Reprezentuesi shqiptar i Gjermanisë, dy golëshin e festoi duke bërë shqiponjën. Ai thotë se mënyra e festimit të golave simbolizon Shqipërinë.

“Jam shumë i lumtur që shënova dy gola dhe ndihmova skuadrën. Janë tre pikë të tjera të rëndësishme. Çdo ndeshje kërkojmë të japim maksimumin. Çdo ndeshje është sikur të shkojmë në luftë për të marrë sa më shumë pikë që të jetë e mundur”, ka thënë Mustafi.

“Mënyra ime e festimit simbolizon Shqipërinë dhe përfaqëson edhe familjarët e mi që jetojnë atje. Ata më kanë kërkuar që t’i kujtoj kur shënoj, ndaj festova në atë mënyrë”, tha ai.

Mustafi është duke kaluar nëpër një super sezon me Valencias. Ai gjatë verës që lamë pas iu bashkua skuadrës spanjolle nga Sampdoria. /Telegrafi/