Mustafës mund t’i dështojë Asociacioni

Kryeministri i frustruar me qytetarët e “painformuar”. Qeveria në panik nga revolta popullore kundër marrëveshjes së dëmshme.

“Qytetarët e dinë çka po nënshkruajnë. Nënshkrimi i qytetarëve do të jetë ai nënshkrim i cili do ta bëjë të pavlefshëm nënshkrimin e Mustafës për Zajednicën! Ky është shqetësimi i vërtetë i kryeministrit”, tha deputeti Rexhep Selimi për ‘Kosova Sot’

Reagimi i një dite më parë i kryeministrit të Kosovës, Isa Mustafa, përmes postimit në ‘Facebook’, kundër qytetarëve të Republikës, të cilët po e nënshkruajnë peticionin e opozitës, me cilësimin se ata janë të painformuar, ka ngjallur reagimet politike.

Deputeti Rexhep Selimi nga lëvizja ‘Vetëvendosje’, i tha gazetës se kryeministri Mustafa po e ndjenë shumë thellë që nënshkrimi i peticionit kundër marrëveshjeve të dëmshme, për Zajednicën dhe Demarkacionin, është nënshkrim për rrëzimin e tij nga pushteti, prandaj edhe ka arsye që të shqetësohet. “Ta dijë kryeministri se qytetarët e dinë shumë mirë se çka po nënshkruajnë. Kryeministri është shumë konfuz dhe jo i balancuar në qëndrimet e tij publike. Nuk janë qytetarët që po e nënshkruajnë peticionin të painformuar, edhe pse një gjë të tillë do ta donte shumë kryeministri. Qytetarët e dinë çka po nënshkruajnë. Nënshkrimi i qytetarëve do të jetë ai nënshkrim i cili do ta bëjë të pavlefshëm nënshkrimin e Mustafës për Zajednicën! Ky është shqetësimi i vërtetë i kryeministrit”, tha Selimi për ‘Kosova Sot’.