Mustafës i shtohen faturat e humbjeve

Vendimi i Gjykatës Kushtetuese i cili i ka dhënë të drejtë ekskluzive PDK-së për ta propozuar kandidatin për kryetar të Kuvendit, ka bërë që LDK-ja të kthehet në defensivë gjatë luftës për krijim të Qeverisë së re dhe funksionalizim të Kuvendit të Kosovës. Kthimin në këtë gjendje, analistët e arsyetojnë në dy mënyra.

Të parët e shohin si respektim të vendimit të Gjykatës Kushtetuese, ndërsa të dytët e përkufizojnë si gjest të njohur pas çdo humbjeje që ka pësuar LDK-ja.

Analisti Imer Mushkolaj ka thënë se LDK-ja, pas humbjeve që i ka pësuar, nuk duhet ta rizgjedhë Mustafën në krye të saj, por, sipas tij, këtij subjekti i duhet ‘gjak’ i ri, një lider bindës, karizmatik dhe ide të reja. “Prej zgjedhjeve lokale Isa Mustafës mund t’i faturohen katër humbje. E para humbja e Prishtinës, e dyta zgjedhjet e përgjithshme, se treti ai tradhtoi vullnetin e votuesve të vet kur e lëshoi postin e kryeministrit me marrëveshjen me opozitën dhe së katërti kur zgjedhja si kryetar i kuvendit doli të jetë jokushtetuese”, ka thënë Mushkolaj.

Ajo çka i mbetet Isa Mustafës, sipas tij, është dorëheqja me nder, nëse mund të quhet e tillë, pas katër humbjeve. “Përpjekja e fundit ishte marrëveshje me AAK-në dhe me Nismën, që të bëhet kryetar i Kuvendit, por duket se edhe kjo është përfundimisht e pamundur. /Tribuna